CM Conrad-i Umran nung Police academy semzüktsü

Shillong, Tsüklai/February 6 (Agencies): Chief Minister Conrad K. Sangma-i, Umran, Niangbyrnai, Ri-Bhoi District nung Bodhbarnü Meghalaya Police Academy ka semzüktsüogo. Iba sentong nung Minister, Home, James K. Sangma dena liasü.
Sentong nung Chief Minister-i, state nung police academy ka amenoktsü asoshi apiteter nem tenüngsang agütsüba den iba academy ajanga state dang masü saka temeket nung aliba state tem nungi police tem training agiba nung teyari tulu agütsütsü, ta ashi.
Paisa, Police academy tasenba ajanga state nung police inyakyim melenshia aoba den liromedema otettsü asoshi police tem nem teyari agütsütsü, ta ashi.
“Sorkar ka ama nüburtem ajak tajangzük bener arutsür kaka kümdaktsütsüji onok mapa lir. Jenjang aketba nisungtem adokdaktsütetra maparen ajak nung takok tajungba ngutettsü. Inyakyim shidak sayuba ajanga police force tajungba aser mapa tajetba kümdaktsütsü,” ta pai ashi.
Maneni Chief Minister-i, police department mapang, rongsen aser tashi timba telungpurtem den raraba nung indok aruogo saka tang state yimjung nung lidar, ta shia digital ajanga sendaktepba lima ka nung khuret tasen ajangshia aotsü asoshi police tem renema alitsü nüngdaker, ta ashi.
Kasa mapang nung Home Minister, James K. Sangma-i, iba academy amenokba nung shilem agiba department ajak nem tenüngsang agütsüba den Ministry of Home Affairs, GOI-i teyari tulu agütsüba atema mejeta pelaba lemsatep aser ashiba agi, Meghalaya Police Academy takok nung bener aotsü asoshi parnok nükjidong lir.
Sentong nung adenertem rongnung Advisor to the Government, D.D. Lapang, MLA aser MGCC chairman, J. Mawlong, Additional Chief Secretary, Home, R. Suchiang aser DGP Meghalaya R. Chandranathan densema liasü.