CM Conrad Sangma-i West Khasi Hills nung school adopt asü

Shillong, Mongputeni (October) 9 (Agencies): Meghalaya Chief Minister Conrad K. Sangma-i Mongulbarnü Nongstoin nung aliba Shohphria Government Lower Primary School semdang.
Iba school ya tawa tu Chief Minister indang ita ka aser tesadang indang itasen (Rs. 3.14 lakh) ajanga yanglushi.
West Khasi Hills nung aliba school ya 1956 küm Presbyterian Church-i lapok aser Meghalaya state tentetba sülen sorkari school ji agi.
Küm 20 dak tema iba school sendoka yutsü aser taoba ita tu CM Conrad-i pa indang itasen agüja school yanglushitsü ta metetdaktsü.
“Sorkari shisaliok ya tongti ta züngshir aser asen tanurtem aser state atema shisaliok kanga tongtipang lir. Iba jagi ni MLA tem, sorkar ketdangsertem aser company temi asen kaketshirtem yaritsü indang mapa atongtet” ta Conrad-i ashi.
Senotsü peria maliba ajanga shisaliok wadang asoshi sen peria magütsüteter saka sorkari temulung agüja mapa inyaka arur. Asenoki akokba tashi asen tanurtem yarira, iba jagi parnok taküm nung temelenshi tulu bentsür arutsü, ta paisa ashi.
Paisa Nongstoin constituency MLA Macmillian Byrsat dang South Tura constituency nung school ka adopt asütsü atema ayongzük.
“Ni MLA ajak dang iba mapa nung yariteptsü aser temelenshi bener arutsü atema mepishir” ta Meghalaya chief minister-isa ashi.
Government Lower Primary school nung tanurtemi ashiba agi, tang school kanga junga angur aser tzünglu arudanga class agiteter.
CM Conrad-i agütsüba sen ajanga classroom 5 den staff rooms yanglushi aser table o chairs den black board dena stationery tem ali.