CM-i anir kija aser teloktemi H. Hokivi Chishi mang ayimer; Tanü 12:00 tashi Dimapur nung dokantem melapoktsü

Dimapur, August 4 (TYO): Shishilembar mongin aser social worker, H. Hokivi Chishi tanep alima nungi pilaogo.
Arishi küm 52 nung lia asür Hokivi Hokolbarnep Eden Hospital, Dimapur nung asü. Pai kinungtsü den jabaso ana aser jala ka toktsür ogo.
Honibar anepdang 8:00 ako nung asür Hokivi den asüpila sentongji par Sematilla kidang agitsü.
Asür Hokivi-i Dimapur Chamber of Commerce & Industries (DCCI) president; ACAUT Founding member; Business Association of Nagas (BAN) Advisor, CNCCI President aser NMBOA President teinyakdak liasü.
Asür Hokivi-isa taoba mapang NPF Dimapur Division nung vice president aser Treasurer inyak aser 2004 küm Dimapur Municipal Council election nunga takok ngua liasü.
Tanü Nagaland Chief Minister, T.R Zeliang-i sangdong ka nung Dimapur Chamber of Commerce and Industries president Hokivi Chishi asüba osang angashia kanga aoksar ta metetdaktsü.
Asür Hokivi Chishi ya shishilembar, social worker aser ochishir Naga lennir ka liasü. Pai Dimapur Municipal Council (DMC) nung tir aser NPF Dimapur NPF Division (2013-2017) nunga tatong tir inyak aser pa ya ACAUT Nagaland nung founding Member liasü. Pai Sumi nunger atema dang masü saka Naga nunger ajak atema bendanga agüja inyak, ta T.R Zeliang-i sangdong nung metetdaktsü.
“Iba ama tejashi mapang nung asür Hokivi’er kibong, medemer aser teyariteper ajak den asükhu lemsateper aser Tsüngremi nenok sünepjang ta sarasademtsür” ta paisa ashi.
Ano külen, Nagaland nungi Lok Sabha MP Neiphu Rio-ia sangdong ka nung asür Hokivi Chishi anojungi asüba osang angashia kanga aoksar ta metetdaktsü.
“Tesüiba mapangtem nung ni pa den ajurutepdang, paji kanga dang tenendak aser bendanga agütsüba lennir ka ta ni ajitet. Pai lokti aser yimten mapa balala nung shilem agia aru” ta Rio-i sangdong nung shia lir.
Asür Hokivi-i Dimapur nung lanur aser shishilembartem ajungkettsü atema mapa jenti inyakogo. Pai 2004 nungi 2009 tashi Dimapur Municipal Council nung inyak aser pa tango sademba anogo tashi Dimapur Chamber of Commerce and Industry (DCCI) nung aser ano New Market Business Owners’ Association (NMBOA) nunga tir mapatem teinyakdak liasü. Pai iba akümli toktsür aobaji Sümi nunger atema dang masü saka Naga nunger ajak atema takoksa lir, ta Rio-isa ashi.
“Ni aser kü kinungtsü den ozü kibongi tasür kibong, DCCI, NMBOA aser temeimer ajak den asükhu lemsateper. Iba takoksa tulu koktettsü atema Tsüngremi nenok nem tashi aser tesünep agüjang ta onoki sarasademtsür,” ta paisa sangdong nung metetdaktsü.
Dimapur Chamber of Commerce and Industry (DCCI), Business Association of Nagas (BAN), Nagaland Medicine Dealers Association (NMDA), East Dimapur Business Association (EDBA), New Market Business Owners Association aser Chumukedima Chamber of Commerce (CCC) nungertemi DCCI President, Hokivi Chishi asüba atema temulung raksar ta sangdong ka nung metetdaktsü.
Asür Hokivi nem akhümtsübu agütsüba sayua DCCI, BAN, NMDA, EDBA, New Market Business Owners Association aser Chumukedima Chamber of Commerce züngsem ajaki August 5, 2017 anüngdang 12:00 ako tashi shishilembadak/dokantem melapoktsü ayongzüker, ta sangdong nungsa shia lir.
Tanep asür Hokivi asüba osang angashiba sülen Dimapur nung shishilembartemi pa nem tetushi agüja dokantem shibanga liasü.