CM-i anir telok balala asür Hukato Naga mang ayimer

Dimapur, October 26 (TYO) : H.N Company kibur aser CMD, Hukato Naga yashi nikongtsütsü London nung asüba osang angashia kanga aoksar, ta Nagaland Chief Minister, T.R Zeliang-i asür Hukato kinungtsü dangi züluba sangdong ka nung metetdaktsü.
Asür Hukato Naga ji Naga nunger businessmen & entrepreneurs rongnung tongtipang nübo ka liasü aser ano pa ya lokti atema mapa inyaker ka liasü, ta paisa ashi.
Pa kanga dang tasütait aser mangdang tulu ayuba nisung ka liasü. Pai shishilembar tetsüdi ka akümbaji, sensaker nungi takar akümba otsü ka lir, aser pa otsü ajanga Nagaland nung lanur entrepreneur aika ajungmesogo.
“Asür Hukato-i loktiliba nung temelenshi bener arutsü atema kanga jangra liasü aser kodangsa küna ajurutepdir, pai state nung terenlok bener arutsü indang tebilembatem lemsatep. Pa ya tamanger tajung ka liasü aser lanurtem dang Tsüngrem nungi temoatsü meshitsü atema tayongzükba agütsü. Pa asüba ajanga Naga nunger rongnung takotet shishilembar ka samaogo” ta T.R Zeliang-isa sangdong nung shia lir.
Business Association of Nagas (BAN)-ia sangdong ka nung asür Hukato Naga asüba atema tejashi lemsatepba metetdaktsüogo.
BAN-i asür kibong den asüku lemsateper aser Tulusang Tsüngremi nenok nem tashi aser tesünep agüjang ta sarasademtsür, ta General Secy., Dr. Khekugha Muru aser President, Thungbemo Murry nati sangdong nung shia lir.
Hukato Naga, CMD, HN Company ajungbena asüba osang angashia kanga aoksar ta NPCC-ia sangdong ka nung metetdaktsü.
Asür Hukato ya Aughanato Constituency nung PCC Member, Hukiye Tissica adianu lir. Asür Hukato ya kanga dang meranga inyakba entrepreneur ka liasü aser pai kanga merangba aser nendaka inyakba ajanga takok tulu angu. Pa asüba ajanga asenoki takotet businessman & contractor ka akoksaogo, ta NPCC sangdong nungsa shia lir.
NPCC-i asür kibong den tejashi lemsateper aser Tulusang Tsüngremi nenok nem tesünep agüjang ta sarasademtsür, ta sangdong nungsa shisem.
Nagaland Registered Class – 1 Contractors Union nung Executive Member, Hokato Naga October 25, 2016 nü London nung asüba osang angashia temulung raksar, ta NRC1CU-i sangdong ka nung metetdaktsü.
Asür Hokato Naga ya züngsem tajung ka liasü aser pai Union atema süoki ia bilemja mapa aika inyak. Pa ya meimchir tajung ka liasü aser nisung ajaki akhümtsübua liasü, ta NRC1CU President, Seyiekuolie-i sangdong nungsa shia lir.
Asür Hokato Naga ya takok anguba contractor ka liasü aser pa asübaji Union atema dang masü saka Naga nunger ajak asoshi takoksa lir. Tsüngremi asür kibong nem iba takoksa koktettsü atema tashi agüjang ta sarasademtsür, ta Seyiekuolie-isa ashi.