CM-i anir yimsüsürtemi asür Er. T. Saku Aier mang ayimer

Dimapur, February 24 (TYO) : February 24, 2016 anepdang Dimapur nung Er. T Saku Aier ajungbena asüba osang angashia aoksar aser mang ayimer, ta Nagaland Chief Minister, T.R.Zeliang-i sangdong ka nung metetdaktsü.
Er T Saku Aier ji Engineer tetangshi ka liasü. Pai Nagaland nung construction industry nung anogoshi aayangertem jenjang ajungkettsü atema mapa tajung inyak, ta TR Zeliang-i ashi.
Asür Saku Aier-i 1994 küm Dimapur nung Saku’s Mission College tenzük. Kaketshir shia nem quality education agütsütsü aser iba dak lia ano kaketshir ajak nem mission mapa angateta inyakdaktsütsü nükjidong nung pai iba college lapok aser iba mapa tajung atema kaketshir meyirjang aikati pa teti bilemtettsü, ta Chief minister-isa sangdong nung shia lir.
Nagaland sorkar aser ozü kibong tenüng nung asür kibong den asüku lemsateper aser Tsüngremi par kibong nem anisüngzük aser tesünep moajang ta sarasademtsür, ta TR Zeliang-isa metetdaktsü.
Nagaland nungi Lok Sabha MP, Neiphiu Rio-ia sangdong ka nung, taoba Housing & Sericulture, Parliamentary Secretary asür Er. T. Sakusangba Aier asüba atema mangyimba metetdaktsü.
Asür Er. T. Sakusangba Aier ji lennir aser yimsüsür ka dang masü saka educationist ka liasü aser pai loktiliba atema mapa aika inyakogo. Pa ya Saku’s Mission College founder aser chairman liasü aser ano tanga shisaliok reju aika nung board member liasü, ta Neiphiu Rio-i sangdong nung shia lir.
Asür Er. Sakusangba-isa Sub-Ordinate Engineers Service Association aser All Nagaland Diploma Engineers Association tenzük. Pai iba lima toktsür aobaji par lokti atema dang masü saka Naga nunger ajak atema takoksa ulura lir. Pai mapa tajung inyakbatem teti bilemtettsü, ta Rio-isa metetdaktsü.
Ano, Nagaland Legislators’ study tour team den NLA Commissioner & Secretary nungertemi sangdong ka nung, Er T Sakusangba Aier ajungbena iba lima toktsür aoba osang angashia kanga aoksar, ta metetdaktsü.
Iba telok nung züngsemtemji – Y Patton (Home Minister), Yitachu (Education Minister); Pukhayi Sumi (Parliamentary Secretary), Dr Benjongliba Aier (Parliamentary Secretary), Dr Longrineken (Parliamentary Secretary), Khriehu Liezietsu (Parliamentary Secretary), aser Benjamin Newmai (Commissioner & Secretary) nungertem lir aser parnok tang Japan aser Indonesia linüktemi study tour atema oa lir.
Asür Er T Sakusangba ya 1938 küm Lakhuni yimdak aso aser 2008 küm 30 Alongtaki Assembly Constituency nungi NPF ticket nung takok angu aser taoba chief minister Neiphiu Rio-i aniba DAN Ministry nung Housing & Sericulture, Parliamentary Secretary inyak.
Pa ya Nagaland sorkar nung Executive Engineer inyak aser All Nagaland Diploma Engineers Service Association (ANDESA) nung Tir inyaka liasü. Pa asüba ajanga Naga nunger asoshi yimsüsür ka aser mongin nisung ka samaogo, ta Home Minister, Y Patton-i Nagaland legislators’ study tour team tenüng nung metetdaktsü.
Parnokisa asür kinungtsü aser tanurtem den asüku lemsatepogo aser iba mangyim mapang Tsüngremi parnok nem tashi tasen agüjang ta sarasademtsüba sangdong nung shia lir .
NPF central Hq. Kohima, Nagaland-i asür Er T Saku Aier mang ayimer aser tasür kibong den asülu lemsateper, ta NPF Press Bureau sangdong ka nung metetdaktsüogo.