CM-i Aoleang Mongyu salem metetdaktsür

Kohima, March 31 (TYO) : April ka nü nungi Konyak nunger Aoleang benjong tenzüker aser April trok nü atemtsü aser iba benjongmong salem Konyak nunger ajak nem agütsür ta Chief minister, Dr.Shürhozelie-i metetdaktsüogo.
Konyak nungertem asoshi iba benjong ya küm tejenba o tasenba na melentepba benjong ka lir. Iba ama benjongmong mapang, asenok ajak Tsüngrem dang küm tasen temoatsü meshia sarasademdi ta CM-isa metetdaltsü.
Iba ama benjong amongba mapang nübortemi pei sobaliba ken,yartsüngsang aser saisapong sentong yanglua akabaji kanga junger. Iba amaji benjong amongba den külemi asenoki asen sobaliba wazüka yua benshitsüla ta paisa ashi.
Iba ama tepela benjong mapang government o nübortem na aser nübortem rongnung tesendaktep akangshia yanglutsü aser ajaki yimjung aser terenlok asoshi inyaktsü nükjidong yur inyaktsüla ta Dr.Shürhozelie-isa metetdaktsü.
Nagaland nung Konyak nunger dang masü saka Phom nungertema April ka nungi trok tashi Monyiü benjong amonger.