CM-i ayongba senden nung madentsü: CNTC

Kohima, February 07 (TYO): Chief Minister, TR Zeliang-i lokti tentet balala den amentsü senden ayongba nung Central Nagaland Tribes Council (CNTC) madentsü, kechiyong iba ya NTAC takhangba aser JCC bangzüng anema lir, ta CNTC Media Cell-i sangdong ka ajanga metetdaktsüogo.
“Kanga memenudang nüburtemi akhangba ama tang teinyakdak CM-i ajemalua menden nungi alutsüla aser telemtetba ka dangi arutsü atema lenmang lapoktsütsüla,” ta CNTC-i sangdong nung shia lir.
Tesüiba hopta ishika tsüngda tatalokbatem ajanga yimsüsüba nung tashimaitba, pei atema bilema inyakba aser TR Zeliang den par Cabinet züngsemtemi nisung tsüngdang dang masü saka Tsüngrem tsüngdanga tenangzükba alema inyakba sayuogo, ta CNTC-isa sangdong nung shia lir.
CNTC-isa, Naga Hoho Tir, Chuba Ozukum-i national media nung ULB election thitemba agi mulungsüa, “State sorkari Naga Hoho, ENPO aser tanga teloktem den o lemtep tenzükshitsüla,” ta jembiba aitsüogo.
Iba dak sentakba nung CNTC-i, pai ‘tanga teloktem’ ta jembibaji kechi? ta asüngdang.
“Lokti yamai petsaprong aliba tensa ka nung Naga Hoho khenyongi samadok aser JCC, NTAC, CNTC, APO, CPO, ENPO-i senteper inyakba ajanga ULB election thitemba sülen iba tenüng tajung agitsü atema tangbo parnok (Naga Hoho) temai adoker,” ta CNTC-isa Naga Hoho aitsü.
“Ajisüaka shirnoki Naga nunger atema nokdaker’ar Naga nungeri junga meteta dang lir. Naga Hoho ji tang tashi tangatetba tentet ka süra, aser Naga tentet tongti ka ta süra, tensa tajung tamajung ajak nung parnok Naga nunger den alitsüla,” ta parnokisa ashi.
Naga Hoho Tir, Chuba Ozukum ya par kin tongti tentet, Ao Senden-ia sendokogo aser Naga Hoho Tir nungi anentsü atema pai memulungba ajanga pai par nübur akhüm metsübur, ta CNTC-isa ashi.
“Iba ama nisung ka ajanga, lenir ka dak koba sempet lir, ibaji shisanger, pai par nüburtem nem temulung agütsür asü pa kija atema bilemer. Pai kechisa jembiogo, ibaji pa nija o lir, aser pa Aor mesüra Naga nunger tenüng nung masü. Joko Naga Hoho ji Naga nunger ajak atema masü,” ta CNTC-isa metetdaktsüogo.
“Asenoki meranga aazükba aser memelentetba temeten atema nokdakdang Naga nunger ajak dang longjema alitsü ayongzüker, kechiyong asen tarutsü lendong nung lir,” CNTC-isa ayongzük.)