CM-i Chega-Gadi/Lamsimngyi/Kwakpo benjung salem lemsatep

Kohima, October 29 (TYO): Nagaland sorkar tenüng nung state Chief Minister, T.R Zeliang-i Zeliang nungertem den Chega-Gadi/Lamsimngyi/Kwakpo benjungtem salem osang lemsatep; item benjung ya Zeliang kin atema kanga tongtibang benjungtem lir.
“Iba benjungmong mapang nung ajak takoksang asen Tsüngremi nüburtem nem temoatsü tulu meküplokja alu nung jenti aruhtsü aser taküm anema yutsütsü ta amanger, iba den külemi benjungtepa aser pelatepa tenüngsang agütsür. Sobaliba yimya nung lokti balala aser yim sasep nung iba benjung anogo balala nung monga aru, aser tanübo iba benjung ya kümshia October 30-31 anogotem nung amonger,” ta Chief Minister sangdong nung shia lir.
“Iba benjung ya tepela, temeim, tai toktepba aser anisüngzükba benjung ka lir, iba den külemi Tsüngrem temoatsü meshia amongba benjung lir. Iba benjung ajangasa asen sobaliba takar indang nenshia asen melung akasodaktsür, aser itemji ajanga ochishiba, akhümtsübutep, kati ka züngshiba, mapa meranga inyakba, tasü-aitba aser aria bilema meimba ajungmesor. Akhidang nungi asen tsüraburtemi benshia aruba yimya tajungtemji maneni asen taküm nung benshidi,” ta CM-isa ajungshi.
“Iba anogomong nung ni Zeliang nunger anema lia tepela nung Chega Gadi/Lamsimngyi/Kwakpo benjungtem tetezü keta amongtsü sarasademtsür,” ta CM, TR Zeliang-isa lemsatep.