CM-i ILP indang jembiba ashishir

Dimapur, March 9 (TYO): ILP Committee-i sorkar nem report agütsüba sülen Cabinet-i iba report benoka jembir agizük. Iba kasa osangji Assembly nung Deputy Chief Minister-ia metetdaktsü aser idangji pai ILP kübok Dimapur dendaktsütsüba ashi, ta JCPI-i tanü metetdaktsü.
Iba telemtetba tajung atema ILP Committee aser Cabinet nem tenüngsang agütsür. Ajisüaka, February 25, 2019 nü osangkakettem nung Nagaland Chief Minister-i Dimapur mesüra Nagaland nung ILP mapa inyakba nung tanga Northeast state tem nungi lisopurtem asoshi talenba salatsütsüla ta ashiba magizüker, ta JCPI-i metetdaktsü.
Iba ya mebilemdangi jembiba onük ka lir aser nüngdak mali. JCPI aser nübortemi akhangba dang nungi balaka lir, kechiyong Nagaland-i ozüng alema arua alirtemji tangalen nungi masü saka NE Region nungi teimba lir, ta parnokisa ashi.
Chief Minister-i jembiba amaji inyakdi süra Nagaland nung BEFR/ILP malitsüla. Pai mim tebilemba kar lir iba onük jembiogo anungji JCPI-i iba onük magizüker. Anungji iba ashishitep aketba onük jembiba atema Chief Minister-i osang tejangja metetdaktsütsü mepishir, ta JCPI-i ashi.
ILP Committee-i bener aruba report nung meinprong magütsütsü ta Chief Minister-i nangzüktsü mepishir. Nagaland Prohibition Act ama tangari menütsüba ozüng ka ama ILP dak sendakba ozüng meyanglusatsü atema mepishir, ta JCPI-isa ashi.