CM-i mepishiba agi mokdangba anogo melenshi; Dimapur Naga Youth Front tentetogo

Dimapur, Jan. 25 (TYO) : Nagaland chief minister-i tan municipal aser town council election agitsüba sentong dak aketba tebilemtsütem par kilonser tazüngpurtem den January 27, 2017 nü senden ka lia jembitsü Joint Co-Ordination Committee dang nangzükba agi, Nagaland ajaklen January 27 anepdang nungi mokdangtsü lateta aliba sentong melenshiogo.
Chief minister-i ken o lemteptsü jaokba ama, Dimapur nungi JCC tenüng nung parnok lenir tuku tashi tua Kohima nung pa ajurua jembiogo saka municipal aser town council agitsü sentong lateta aliba thitemtsü asoshi Chief ministeri menangzüktet saka pai JCC purtem dang January 27 nungi Nagaland ajaklen mokdangtsü asoshi telemtetba agia aliba telemtetbaji agiendaktsünüa mepishi aser January 27 nü par kilonser tazüngpurtem den senden ka mena JCC-i benokba ken o ji jembitsü nangzük.
Iba temepishiba aser tenangzükba o nungji ajemdaker, Bodbar nikongdang Dimapur nung lokti tentet balala lenirtem den senden ka amendang, mokdangba sentongji mayongzüki January 27 tashi atatsü saka iba anogo nung government-i telangzüba tajung magütsüra January 28 nü nungi 1st Febraury tashi tanen maka mokdangtsü saka January 29 Deobar anogo nungbo salatsütsü telemtetba agiogo.
Iba mokdangba sentong mapa küma inyaktsü asoshi Dimapur nung aliba Naga kin shia nungi lanurtem telongjem tentettem agi akümba telongjem ka tenüng agi Dimapur Naga Youth Front telok ka tanü tentetogo.
Nagaland government-i February ka nü municipal aser town council election agitsü sangdonga liaka nübortemi iba sentongji khen atema thitema atatsüla ta takangba agüja lir.
Bodbar nikongdang Dimapur Chakhesang Hoho ki nung lokti senden temer külen osangbenertem den jembidang, “Onoki Chief ministeri mepishiba ken o ji akümtsübu agüja agizükogo aser government-i nübortemi ashiba angatsü teimla nung onoki mokdangba sentonga thitemogo,” ta JCC lenirtemi metetdaktsü.
Ajisüaka, government-i telangzükba tajung magütsüra January 28 nü nungibo anogo tatakzük maka nübortemi aginüba matalok tashi Nagaland ajunga mokdangtsü ta parnokisa metetdaktsü.