CM-i Press Secretary shimogo

Kohima, September 02 (TYO): Tanü Nagaland Chief Minister, TR Zeliang-i pa indang Press Secretary inyaktsü atema Sebastian Zumvu shimogo, ta Chief Minister’s Office, Nagaland Media Cell-i sangdong ka ajanga metetdaktsü.
Zumvu ya Nagaland nung journalist tejentem rongnung ka lir aser 1990s mapang nungi tenzüka mapang ka nung nüngtugu aliba Nagaland Weekly Journal News magazine nung columnist ama inyaka iba wadang nung ajemok.
1998 küm Northeast Herald pai ketdangsüa adok aser yimozülur liasü, iba den külemi taoba Chief Minister S C Jamir-i 2004 küm state toktsür Goa-i aoba mapang tashi pa indang Press Secretary inyak aser Goa nung oa Goa Angh SC Jamir atema OSD inyak. Iba dak alia 2008 küm nungi 2010 küm tashi pa Maharashtra Angh asoshia OSD inyakogo.
Pa taoba Chief Minister Neiphiu Rio dena inyaksema aruogo aser Naga People’s Front nung züngsem ka lir.
Yimtenren aser social commentator ka ama pai mejemba sangro kar aser “Son of the Soil” nüngja nung otsü tatsü ka NEHU English text book nunga amshidar.
Pa Chief Minister Office nung Secretary to the Government of Nagaland jenjang nung inyaktsü, ta CMO Media Cell-isa sangdong nung shia lir.