CM-i Punglwa yimdak Hydro Electric Project semzüktsüogo

Kohima, December 21 (TYO): Brihostibarnü Peren district kübok Punglwa yimdak Nagaland Chief Minister, T.R Zeliang-i Department of New & Renewable Energy kübok 2 x 75 Kw Noirol Stage-II Mhp semzüktsüogo.
Iba sentong nung jembidang Chief Minister-i, iba project semzükba ajanga iba tesem nung power nung terenlok akatsü, ta metetdaktsüba den külemi yimdaklirtem dang amalitepa inyaktsü aser iba project ya nüburtem dang atema amshitsü ajungshia liasü.
Paisa Punglwa yimi terenlok mapatem atema ali tenla agütsüba atema pelaba lemsatep.
Iba project mapa ya Genmachines Pvt. Ltd.-i küm ana agia inyak aser iba mapa nung sen lakh 287.25 indok.
Department nung ketdangsertem aser staff tem aser Punglwa Village Council-i yaritepa inyakba ajanga iba project takok ngua tembangogo; iba project atema Ministry of New & Renewable Energy (MNRE) aser North east Council (NEC)-i senotsü agüja liasü.
Iba project nungi adokdaktsüba energy ji Punglwa aser temeket nung aliba yimtsüngtem nem agütsütsü; tzüngluruwa mongpu nung energy tali adokdaktsübaji grid nung inoktsü, kechiyong iba ya ‘grid interactive’ atema yangluba lir.
Tanü iba sentong nung Chief Minister den Home Minister Azo Nienu, Horticulture Minister, Kejong Chang, Cooperation Minister, Imtilemba aser Geology & Mining Minister, P. Longon nungera densema liasü.