CM-i Shamator nung DC office tasenba semzüktsü

Dimapur, Aenjeti/January 16 (TYO): Yimchungru kin Tsungkamnyo Mini Hornbill benjung amungba den denchitepa Nagaland Chief Minister, Dr. Neiphiu Rio-i January 16 nü Shamator nung DC office Complex tasenba semzüktsüogo.

Paisa, DC office den Superintendent of Police, DPRO office, DYRO office, DPO (Planning) office aser District Sericulture Office semzüktsüogo.

Nüburtem tali tajungba tenzüktsü aser District Administration institutional framework tashi itshidaktsütsü atema item office tem semzüktsüogo.

Office semzüktsüba sentong nung o jembiba mapang Chief Minister-i, departmental engineer, contractor, mapa inyakertem aser iba tesem nung alirtem dang parnoki bendanga agüaja teka amteper inyaba den inyakyim nongita yariba atema tenüngsang agütsü, aser iba ajanga iba mapa ya District nung aliba nüburtem atema asangsang kümdaktsüogo, ta ashi.

Dr. Rio-isa, Shamator ya Nagaland nung tawa tentetba district tem rongnung ka lir aser iba district nung terenlok balala bener arutsütsü aser administration ya nüburtem dangi anasatiba bener arutsütsü nükjidong nung amenok ta ashi.

Ajisüaka Deputy Commissioner indang office ka makaba ajanga ketdangsüba, department tem tsüngda tesendaktep, public service balala agütsüba aser sorkar scheme tem benoka inyakba nung tetsükdaktsü ajangshia aruogo, ta pai ashi.

Tang item office tem semzükba sülen tawa aliba ajak süngdaktsütsü, aser District Administration kanga junga inyaksangshitsü asoshi tamendakdaka akangshitsütsü ta Rio-isa shimsem.

Deputy Commissioner ya District jenjang nung principal administrative aser Executive authority lir aser revenue, administration, temzüng ozüng achaayangtsü, disaster management, terenlok maparen, line Department tem yongtsüng nung sentong yanglutsü aser apulatsütsüji DC khuret lir ta shia Rio-i ashiba agi, District nung iba office amenokba ya ketdangsüba akangshitsü, service balala tajungba agütsütsü aser lenla ajak nung nüburtem ajangzükdaktsütsü asoshi kanga tongtibang lir. Rio-isa, Treasury and Sub Treasury Office ya senotsü tsütateptsü nüngdak apir amenoktsü ta shisem.

Maneni CM-i, Shamator District nung aliba nüburtem dang iba facility pei meyong ama anepalutsü aser takokba tashi amshitsü ajungshia liasü.

Rio-isa, nüburtem den Tsungkamnyo benjung salem lemsatep aser office Complex tasenba semzükba sülen Shamator District putu tasen kati ayaoka ia terenlok nung aotsü imlaja ataba lemsatep.