CM-i SIT ka kümtettsüba molunga agizükogo

Agartala, September 26 (Agencies): September 20 nü osangbener Shantanu Bhowmik tepsetba dak sendakba nung state police kübok Special Investigation Team (SIT) ka kümtetta iba ken o bushisüngdangtsü asoshi Chief minister Manik Sarkar-i molunga agizükogo.
Agartala Press Club nungi züngsem kari Hombarnü Sarkar den ajurutepa liasü. Parnoki SIT ka kümteta ken o bushisüngdangtsü aser maneni ken o ya fast-track court ka nung obendang agütsütsü asoshi takhangba ka agütsü. “Chief Minister-i SIT ka kümtettsüba aser fast-track court ka atema akhangba kanga temolung agüja angaogo aser pai Director General of Police (DGP) dangi SIT ka kümtettsü asoshi anepalutsü atema tetuyuba agütsüogo,” ta Sorkar sangdong ka ajanga metetdaktsü.
Ajisüaka STI ka kümteta ken o asadangtsüba takhangba dak sendakba nung mepetmesü adoka liasü, kong state nung osangbener lokti tekui Agartala Press Club-i takhangba aitsü. Parnoki ashiba agi SIT masü saka CBI nem iba ken o bushisüngdang daktsütsü asoshi akhang nung tajungba süla. “Press club-i takhangba angashia onok süngmanger. Paronki tetenzük nungi yimjak nung CPM pur pusema arudar aser osangbener lokti anema inyaker,” ta osangbener tejen aser joint movement forum of journalist bodies convener Subal Kumar Dey-i ashi.
Pai Agartala Press Club puri chichiba aibelena alirtem kümzüka ayutsü merangba atema aitsü. Iba takhangbatem dak temolung mesüi Tripura Pradesh Congress Committee sitting high court judge kati judicial inquiry ka agitsü asoshi khangogo.
“Onoki Tripura Police mesera CBI dak tamang makar. Telok anaprongla ya yimden yimsüsüba tsütsü tajangzük atema amshitettsü, aser ochi obendang ka angutsü asoshi kecha timla mali. Tang tashi nung nisung tepsetba ken o ka danga CBi-i puteta obendang agüja mali aser kuli tejangja ngutetba sülena aibelena alirtem nem tapet temerenshi magütsüteti ken o meyirejang aika police ket nung bangdak lir,” ta Congress legislature party lenir Gopal Chandra Roy-i ashi. Congress nung lenirtem DGP Akhil Kumar Sukla ajurua ochi obendang ka asoshi akhangtsü atema sentong yanglua lir.