CM-i Teachers’ Day salem metetdaktsür

Dimapur, September 4 (TYO): Nagaland Chief Minister, T.R. Zeliang-i Teachers’ Day 2016 tenüng nung tesayur ajak dangi salem osang metetdaktsü.
“Linük ajunga nung tesayurtem nem tetushi agüja Teachers’ Day amunger. September 5 ya India nung taoba Tir, Dr. Sarvapalli Radhakrishnan  tasoba anogo lir aser pa ya tesayur tajung ka, shisashir ka aser lennir tajung ka liasü,” ta CMO, Kohima indang sangdong nung shia lir.
“Mapa tejentem rongnung tesayur mapa dena lir aser iba mapa ya meimchir shia meteta akümba mapang nungi akhümtsübua aruba mapa ka lir. Tesayurtemi kaketshirtem sayua anitetba dang masü saka parnoki loktiliba aser linük tarutsü yanglutsür. Anungji, kanga dang kara ainba linüktem nungbo loktiliba nung nisung tajungtibatem ang shima tesayur mapa inyakdaktsür,” ta TR Zeliang-i sangdong nung metetdaktsü.
“Asenok ama tangar memenepba loktilibatem nung nisung tajungtibatem dang tesayur inyaktsü shimtsübaji tamakoktsü, saka asenoki asen loktiliba indaktsünüra iba alizüng jia ayutsüla,” ta paisa shisem.
“Teachers’ Day nüngtem nung ni linük nung tesayur ajak dangi salem abener aser maneni nenoki loktiliba azükarudaktsütsü asoshi nendaka aser bendanga agütsüshir inyaktsü ayongzüker,” ta Nagaland Chief Minister-isa tesayurtem ayongzük.