CM-i Wizabo asüba mangyimer

Dimapur, October 18 (TYO): Wb. R. Wizabo Zeliang mapang talangka shiranga aruba sülen tanü Eden Hospital, Dimapur nung asüba osang angashia jashir aser mangyimer, ta tanü Nagaland Chief Minister, T R Zeliang-i sangdong ka nung metetdaktsü.
Asür R. Wizabo Zeliang ya Zeliangrong Students Union nung General Secretary inyaka liasü, iba sülen 1969 küm pai State Election nung toktep. 1972 küm June ita nung pai NPSC tatidang nung takok ngua Circle Officer (CO) inyak, iba sülen pai Phek Deputy Commissioner mapa densema district balala nung Administrative Officer inyaka aru. Election nung ano tokteptsü atema 2002 küm pai Food & Civil Supplies Director nungi voluntary anisüngzük. 1994 Jan. 16 nungi Liangmai Baptist Church, Dimapur nung Deacon cum Advisor inyak aser 2009 küm nungi tasünü tashi Head Deacon inyaka liasü.
“Asür, R. Wizabo Zeliang ya lokti tenzükba nung kanga tenendak liasü aser ketdangsüba tsütsü pai kanga nendaka inyakba aser tsüngchia amangbaji teti bilemtettsü. Pa asüba ya kanga takoksa lir aser iba ama mangyim mapang nung ni aser ozü kibongi mangyimer kibong den mangyim lemsateper. Asür tanela tatem makai anisüngzükdakjangma,” ta sangdong nungsa shia lir.