CM matsüngdang nisung kati soseta asütsü merang

Guwahati, October 18 (Agencies): Assam-West Bengal inter-state arrtsü nung check gate aliba tem nung inyaka alir ka linük nung GST benokba ajanga gate tem shibangba agi mapa makai akümba sülen Hombarnü pai secretariat nung chief minister Sarbananda Sonowal matsüngdang mim chia soseta asütsü merang.
Nisungba tenüng ya Bidur Choudhury ta jangajaogo aser pa ya küm 30 shi lir. Pai mim bottle ka jemzüka yokba sülen apudaker Sonowal nem shidi ka aser Gita ka ta dener file ka agütsür longdak. Iba sülen pa Guwahati Medical College and Hospital-i CM convoy indang ambulance nung anir ao. osang ajanga ashiba agi pa temang tajungba lir aser lendong nungi jenbuogo.
City police commissioner Hiren Nath-i ashiba agi, “Nisungba ya tangbo kanga junga lir saka pai soseta asütsü merangba atema onoki ken o ka benokogo.”
Sonowal den külemi ailba nisung kati ashiba agi, “CM ba ya 1buba Guwahati International Film Festival atema renemshiba dak sendakba nung lepa reprangshiba senden ka nung secretariat nung CM, block conference hall nung dener adokya aliba mapang nisung ka ajungbena adok aser apudak. Pa CM nem file ka amoktsü aser CM-i ibaji tagizükdak nung nisungba ya ali nung longdakadok. Police temi ashiba agi, pai bottle ka nung bena aliba mim ajem.”
Nisungbai bena aliba file nung Sonowal dangi züluba shidi ka liasü kong Bidur-i Sonwal CM ama putu aika inyakdaktsünüba shia lir. Pa asüba sülen CM-i par kinunger ka nem mapa agüjanga, ta shidi nung züluja liasü.
Bidu ya Dhubri district nungi lir aser pa Kokrajhar district kübok Srirampur check gate nung inyakya liasü. Tangar aika den külemi GST kübok sarusaji ajak anendaktsüba sülen Bidur mapa makai aküm.
Iba tatalokba ya security makangba ajanga atalok ta reprangteta police temi secretariat complex nung security tali akangshiogo koba mezüng yongi high-security zone lir. Police temi tesemdangertem asadangtsü atema multi-level frisking points amenokogo.