CM Mukul Sangma-i BJP nung kodanga madentsü: Nalin S Kohli

Guwahati/Shillong, April 09 (Agencies): Honibarnü BJP-i, Meghalaya Chief Minister, Mukul Sangma-i BJP nung adentsü ta Congress Party-i yazü osangtem proker, ta aitsü.
Yashi BJP National otongdar aser Meghalaya in-charge, Nalin S Kohli-i, Meghalaya Chiuef Minister, Sangma BJP nung adentsüji otsü-mali, kechiyong pa tangatetbatemji BJP onüktem anema lir, ta ashi.
“Item olulu ya Congress camp nungi adoker. Himanta Biswa Sarma (Assam health minister aser North East Democratic Alliance convener)-i iba osangji tai ta shiogo, aser ni-a iba osang ya tai ta ashir,” ta paisa metetdaktsü.
State sorkar tashi nung aliba party, Congress-ia, Sangma BJP nung adentsü ta jembiba osangji tai ta shiogo.
Congress-i aiben, Sangma ya akhidang nungi Congress nübo lir, aser pa ya Congress party longjemdaktsür ka lir, ta ashir.
Cabinet minister aser Congress lenir, Prestone Tyngsong-i, “Sangma-i BJP nung adentsü ta asübaji ni kodanga mangashidang,” ta ashi.
Sangküm Meghalaya nung assembly election agitsü lia iba olulu ya jembir. Tang assembly nung BJP MLA kata meliaka parnoki Khristan timba aliba state sorkar nung züngoktsü meranger.
BJP-i Assam, Arunachal Pradesh aser Manipur state tem nung takok anguba sülen tang parnoki Meghalaya nung tenük yokdar.