CM Neiphiu Rio-i ozüng amertem ayongzük

Dimapur, September 27 (TYO): Ozüng amertemi temeten agütsütsü atema inyakba nung tongtipangtiba ozüng shitak benshitsüba aser item tangatetba sülen anidaktsüba lir ta Nagaland chief minister Neiphiu Rio-i metetdaktsü.
“Democratic linük ka nung ozüng amertemi tongtipang shilem agir aser nenoki temeten agütsür aser ozüng tiptema ayur,” ta Rio-isa ashi.
Hokolbarnü Agri Expo, Dimapur nung Nagaland Bar Association küm 50 ajungba benjong nung Chief Minister Rio-i iba olen jembi.
Ozüng amertemi asen sobaliba ozüngtem aser inyaksangshi jungjunga bendena ayuba maparen nung shilem agitsüla, ta pai ayongzük.
“Tanü asenoki Citizenship Amendment Bill, Register of Indigenous Inhabitants of Nagaland, Nagaland ajungalen Inner Line Permit mapa tenzüktsüba indang tebilemtsütem ajurua lir. Anungji ozüng amertemi iba maongka agia, ozüngi melaba ama item tebilemtsütem koktettsü merangtsüla” ta Rio-i metetdaktsü.
Iba ya ozüng amertem mesüra sorkar atema dang masü saka Naga nunger ajak atema tongtipang lir, ta paisa ashi.
“Nagaland nung High Court balaka kümtettsü atema state sorkari akokba tashi mapa inyaka arudar,” ta Chief Minister-isa shisem. Iba sentong nung pai jubilee nüngo sayatsü.
Tanü agiba sentong nung Retd. Justice, Supreme Court of India, Justice H K Sema-i Nagaland Bar Association küm 50 tashi aruba osang metetdaktsü.