CM Nephiu Rio-i ‘plastic waste management drive’ tenzüktsü; Urban Nagaland ODF kümogo

Kohima, October 2 (TYO): Nagaland Chief Minister Neiphiu Rio-i tanü state ajung nung ‘Shramdaan on Plastic Waste’ maparen tenzüktsü.
Rio den cabinet züngsemtem aser MLA temi tanep Kohima nung merükmeju mapa inyak.
Urban Development Department kübok ‘Cleanliness is Service’ volunteers den jembidang Rio-i “state ajungalen plastic jana bendenba ya Prime Minister Narendra Modi-i lipoküm merüka ayutsü temepishiba ama inyaker” ta ashi.
“Mahatma Gandhi sor küm 150 ajungba tenüng nung Prime Minister-i sentong aika atongba atema kanga pelar. Talisa linük ajungalen Swachh Bharat aser Open Defecation Free campaigns tenzükba atema pelar” ta Rio-i ashi.
Jila merükmeju masüba atema sorkar dak zübazüba tai tongloktsür saka iba ya sensotem dak keta lir, kechiyong sorkar kaji sensotem indang noksa ka ama lir, ta paisa shisem.
Kohima jila nung azüklen cable aser pipe abenba atema mepelaba olen ka Rio-isa ashi.
“Iba merükmejuba mapa takok angutsü atema senso ajaki shilem agitsüla. Talisa Kohima aser Dimapur nung alirtemi merükmeju mapa len anir inyaktsüla” ta Chief Minister-isa ayongzük.
Sorkari gari lenmang aser külentsü ayimdak tajungba kümdaktsütsü merangdar aser department temi Hornbill Festival matongdang jila ajak tobur tajung kümdaktsütsü merangtsü. Ajisüaka iba nung public-i yariteptsüla. Asenok longjem nung dang inyaktettsü” ta Rio-isa ashi.
Tanü iba sentong nung Chief Minister Rio-i plastic mamshitsü indang tezüngzüktep agidaktsü.
Sentong nung mendenji Urban Development Joint Secretary Elizabeth Ngully liasü aser Kohima Baptist Pastors Fellowship President, Dr Kevichalie Metha-i temoatsü meshia sarasadem.
SBM (Urban) & Angikaar: Urban Development & Municipal Affairs Advisor, Dr Neikiesalie Nicky Kire-i tanü Swachh Bharat Mission (Urban) aser ‘Angikaar’ kübok centrally sponsored schemes indang osang metetdaktsü.
SBM (Urban)-i state nung urban local bodies (ULBs) 19 nung mapa balala inyaka arudar aser iba mission ajanga metsümeshidak (individual) 16,016 tashi yangluba nung yaritepogo. Taoba küm 5 tsüngda Municipal aser Town Councils balala nung metsümeshidak yanglu, ta Nicky Kire-i ashi.
SBM-isa taoba küm pungu tsüngda ULBs 19 nung community toilets 235 tashi yangluba nung yaritepogo, ta paisa shisem.
Department-i solid waste management atema machineries aser vehicles 54 tashi aliogo aser Municipal o Town Councils nem agütsüogo, ta Nicky-i metetdaktsü.
Item mapa inyaka aruba ajanga Nagaland-i linük den külemi urban areas ajak Open Defecation Free ta sangdonger ta paisa ashi.
Dr Nicky Kire-i Angikaar campaign tenzüktsüdang Ministry of Housing & Urban Affairs (MoHUA)-i “PMAY – Housing for All (Urban) Mission” tenzükogo aser iba ya 2015-2022 tashi inyaktsü ta ashi.
Iba Mission ajanga States aser UTs nem Centre-i senotsü teyari agütsür aser 2022 tashi nung temsüa aliba kibong/nisung nem ki agütsür.
Nagaland nung Municipal Affairs Department-i iba mapa shilem ana kümer- ‘Beneficiary Led Construction Scheme’ aser ‘Credit Linked Subsidy Scheme’ inyaker.
Beneficiary Led Construction Scheme kübok sensakeri ki yangludang India sorkar indang subsidy Rs.1.5 Lakh agütsür. Külen ‘Credit Linked Subsidy Scheme’ kübok beneficiary nem ‘home loan on interest subsidy’ agütsür.
Nagaland nung Angikaar Campaign atema jila 14 shimteta lir aser iba nung beneficiary 12,389 ayimjemtsü.
“Ita asem inyaktsüba Angikaar campaign ji tanü tenzüktsüogo aser December 10 nü tembangtsü. Iba maparen ajanga “New India” leni Nagaland len anitsü imlar” ta Dr Nicky Kire-i metetdaktsü.