CM Okram Ibobi Singh noksa rongdoktsü

Imphal, February 28 (Agencies): Extra Judicial Execution Victim Families Association Manipur (EEVFAM) nung züngsemtemi Hombarnü, takoksa ajururtem asoshi temeden meshia, chief minister Okram Ibobi Singh, taoba mapang DGP Y Joykumar Singh aser police ketdangser ka indang noksa rongdoktsüogo.
Iba tatalokba AICC vice president Rahul Gandhi taruba election atema Imphal nung sentong ka nung maden tsüngda atalok. Ibobi Singh taruba election nung PRJA telok nungi Irom Sharmila Chanu aser BJP candidate L Basanta Singh den Thoubal menden atema dokteptsü, aser Joykumar National People’s Party (NPP) telok nungi Uripok Kendra menden asoshi tokteptsü.
1979 aser 2012 tsüngda taila kahtepba ken o 1,533 sangdongba atema EEVFAM puri temeden meshir. Iba ken o nung telongpur Chungkham Sanjit aser mashisa alila Th Rabina Devi, 2009 July 23nü Manipur Police commando-i tepsetba densema lir.
Iba telok ajanga Armed Forces Special Powers Act (AFSPA) agintsü atema meranga inyakdar. Parnoki ashiba agi taila kahtepba timbaka Ibobi Singh-i küm 15 yimsü asüba mapang atalok.
Taila kahtepba ken o tem Supreme Court nung telemtetba magütsüi sadaka lir, aser ken o kar atemabo SC-i state sorkar dang takoksa ajuruba kibongtem nem teyari agütsütsü asoshi metetdaktsüogo.
Manipur Press Club nung senden ka agiba sülen EEVFAM züngsemtemi pei kinunger tasürtem noksa bener sentong tatsüka agiba sülen nikongtsütsü Imphal yimti Kanglapoat lenmang nung CM, taoba DGP aser 2 IRB commandant Akoijam Jhalajit Singh noksa rongdoktsü.