CM Rio-i Adinno Phizo asükhu lemsatep

Dimapur, Mongputeni/Oct. 09 (TYO): Hokulbarnü Nagaland Chief Minister Neiphiu Rio-i Naga National Council (NNC) tir Adinno Phizo asükhu lemsatepdang Naga yimten puti otsü nung la ya tongtipang nübu ka liasü ta ashi.

Rio-i asükhu lemsatepba nung 1990 küm Bromley, London nung Adinno den lar kidang pa kinungtsü tenati ajurutepba bilemteta liasü. La Nagaland-i meyipa shilangba sülen la den maneni tesendaktep tajung nung liasü aser la den aiben ajurutepa lai Naga nunger meimba pa nük agi nguogo, ta ashi.

Adinno ya asür AZ Phizo’er tanur rongnung tantsütila liasü, aser lai küm aika tebu yimten mapa tongzükba bener jaja. Naga political movement timtemba mapang la tebu den külemi nokdak aser tesülen lai NNC ania otsüsütsü jenjang nung tejangja ola ka akum, ta ashi.

1990 nung tebu asüba sülen la NNC tir ka ama küm 30 dak tema tenzüka aru aser la London nung aliba aser iba sülen Nagaland-i arua Naga yimten ken o nung shilem agiba ajanga lai Naga nunger meimba aser bendanga agütsüba sayur, ta Rio-i ashi.

La asüba ya Phizo’er kibong nung züngsem ka samaba kisüng masü saka Naga political journey nung küm aika shilem agiba nübu ka samaba alitsü, ta ashi.

State sorkar aser külem tenzüker tenüng nung Phizo’er kobong, NNC aser mangyimer ajunga den asükhu lemsateper, ta CM Rio-i ashi.

Nagaland Pradesh Congress Committee (NPCC) sangdong ka nung NNC tir Adinno Phizo asüba ya Naga yimten puti otsü nung tongtipang chapter ka tatem kati aruba alitsü, ta ashi.

Deputy Chief Minister, T.R.Zeliang-ia asür Adinno Phizo ya Naga lima asoshi bendanga agütsür tasü ita aser masetshi nokdakba tetsür ka liasü, ta ashi.

Lai Naga yimten asoshi shilem tajung agiba ya teti akhumtsüboa bilemtettsü, ta pai ashi.

A.Z. Phizo’er jala tantsütila Adinno Phizo asüba asoshi Naga nungeri mangyimba nung National Socialist Council of Nagalim aser Government of the People’s Republic of Nagalim dena lir ta NSCN/GPRN sangdong ka ajanga ashi.

London nung 1990 küm A.Z. Phizo asüba sülen asür Adinno-i bendanga agütsür ochi nung la mapa tongzüka aben. NNC indang tanüker ka am alai Naga nationalism tanüla mesamai takum lidaktsü, ta ashi.

Mapang ka-ka asen yimten lenmang balala süaka A.Z. Phizo lenisüba kübok onoki NNC nem akhum agüja aru, shibai tanü nokdaka aliba Naga political groups ajunga atema otsüsütsü tamendak dak yangera liasü, ta NSCN/GPRN ajanga ashi.

NSCN/GPRN nung züngsem ajunga tenüng nung mangyimer kibong, NNC aser Naga nunger ajunga den asükhu lemsateper, ta parnoki ashi.