CM Rio-i anir MLA temi COVID-19 vaccine agi

Naga Hospital Authority Kohima (NHAK) nung Chief Minister Neiphiu Rio, pa kinungtsü Kaisa Rio aser Dy CM Y Patton nunger Covid vaccine agidang tangokba noksa angur. (Kohima, March 3)

Kohima, March 3 (Agencies): Bodbarnü Nagaland Chief Minister Neiphiu Rio-i anir pa kinungtsü Kaisa Rio, Deputy Chief Minister Y Patton, Cabinet Minister tem aser MLA temi COVID-19 vaccine mezüngbuba dose agiogo.

“Kü temang akhi ama junga dang lir” ta Naga Hospital Authority Kohima (NHAK) nung vaccine agiba sülen CM Rio-i ashi.

“Asen linüki vaccine yanglutetba atema nüma atanger. Mezüngbuba shilem nung healthcare aser front line workers nem agütsüogo aser tang teintet rogotem aser temang nung tashidak alir arishi küm 45 ser temapurtem agir. Anungji, iba ya asenok ajaki vaccine agitsü maongka ka lir” ta paisa metetdaktsü.

“Nisung ajaki na anasa aliba moz kidangi orr vaccine agitsüla. Ano, mezüng dose agirtemi anogo 28 lir külen tanabuba dose agitsüla” ta Rio-isa ayongzük.

COVID-19 vaccine ajanga linük nung shiranger ajemtsü aser rongsenkettsüng tsütsü takarba akümtsü imlar ta Rio-isa ashi.

Nisungtemi vaccine agitsü nungnangba atema osangbenertemi asüngdangdang “January 16 nungi tenzüker Mongulbar tashi nung nisung 31,391 nem COVIDSHIELD dose 37,000 tema agütsüogo. Iba ya temolung melemi bilemba sample nung kanga ajema putetba agi asütsü akok” ta CM Rio-i langzü.

“Nisungtemi zübazüba bilemer asütsü akok saka asenoki kecha masütsü’ar ta mebilemi vaccine agitsüla” ta paisa metetdaktsü.

Tanü NHAK nung Advisor K T Sukhalu aser Advisor Phukayi natia vaccine agi aser külen District Hospital Dimapur nung Minister Kashiho Sangtam aser advisor Neikiesalie Kire nati vaccine agi.

Maneni, Health & Family Welfare minister, S Pangnyu Phom-ia tanü Dimapur nung Covid-19 vaccine agiogo.

“Kohima aser Dimapur nungi tenzüker meta talang pilar aliba tesemtem nung alirtem ajaki vaccine agitsüla. Ni tanü Covid-19 vaccine dose mezüngbuba agiogo aser anogo 28 lir külen tanabuba dose agitsü” ta Minister Pangnyu Phom-i ayongzük.

Tanü Forum for Nagaland Reconciliation, Convenor Rev. Dr. Wati Aier-i vaccine dose mezüngbuba agi.

“Tia kaa Covid vaccine agir mezüngpur nung densemogo. Vaccine agiba ya kanga tongtipang aser nisung ajaki aser talisa teintet rogotemi vaccine agitsüla. Social media nung olulu prokshiba nung mamangtsüla saka Tsüngrem dak dang tamang ayutsüla” ta Dr. Wati Aier-ia ayongzük.