CM Rio-i asükhu lemsatep

Dimapur, Yimpoksüi/November 19 (TYO): Retired Civil Surgeon aser Oriental Nursing Home Dimapur Proprietor Dr. C. Tarep Ao November 18 nü Dimapur nung asüba osang angazüka aoksaba aser temulung mepelai bilemba CM Rio-i lemsatepogo.
Dr. Tarep ya Mopungchuket yimtsüng nungi lir, pa tanur asüdang Impur Mission School nung azüng aser 1951 küm Mokokchung Government High School nung matric pass asü. Pa Assam Medical College, Dibrugarh nungi 1960 küm medical studies tembanga azüng. 1965 küm Satribari Christian Hospital nung mezüngbuba Indian Medical Superintendent aküm aser 1967 küm pa Nagaland Government Service-i ai aser 1988 küm Civil Surgeon Mokokchung ama mapa nungi anen.
Sorkar mapa nungi anenba sülen Dr. Tarep-i Oriental Nursing Home lapok aser nüburtem maneni tenzük. Pa Dimapur senso tajung ka liasü aser pai tamangba yimsü kecha mebendangi toklang tenzükertem nem angati agi teyari agütsüba atema pa ajaki jangjaa meteta lir. Pai sorkar tenzükba aser nüburtem nem teyari agütsüba tarutsü anogotem nunga bilemtettsü.
Iba amala mangyim tejashi mapang nung kü kinungtsü asoer ozü kibongi asür kinungertem den asükhu lemsateper aer teyanglur Tsüngremi parnok nem iba mangyim jashi koktettsü atema tashi aser tesunep agüjang ta sarasademtsür.
Pa tanüla tesunep nung anisüngzükdakjang, ta CM-i sangdong ka ajanga lemsatep.