CM Rio-i HSLC nung takok angur dangi shidi zülu

Dimapur, june 8 (TYO): Nagaland Board of School Education (NBSE)-i ketdangsüa agiba HSLC tatidang nung toppers aser takok angur ajak dangi Nagaland Chief Minister Neiphiu Rio-i shidi ka ajanga tepela lemsatepba den tenüngsang agütsüogo.
“High School Leaving Certificate (HSLC) nung takok anguba ya kaketshir ka shisaluyimba nung tongtipang ajangzüktetba ka dang masü saka kija shia atema alizüng ka atongba lir,” ta Rio-i shidi nung shia lir.
Paisa kaketshirtem dang tarutsü anogotem ajurutsü aliba tayongzükbatem atema bendanga agütsüshitsü ayongzük.
“Tanü Covid-19 wara ajanga asenok taküm libaliro nung kongshiogo aser teti atema melenshitsüogo. Asenoki tensa melentepa aoba den liromedema alitsüla aser temelenshi bener arurtem asütsüla” ta Rio-isa ashi.
Paisa kaketshirtem tebilemtsü abenba senso ka ka asütsü, alima temerükba akümtsü atema mapa inyaktsü, tetsür o tebur tebendang malitsü atema inyaktsü aser yimjung den taochi osang abenertem asütsü atema ayongzük.
Rio-isa kaketshirtem dang Nagaland state indang sobaliba aser libaliro indang ambassador tem asütsü atema metetdaktsü.