CM Rio-i Sechii Zubza Village Council Hall semzüktsü

Kohima, Aenjeti/January 28 (TYO): Nagaland chief minister Neiphiu Rio-i tanü Kohima district kübok Sechii Zubza nung Sechii Zubza Village Council Hall semzüktsüogo.

Sentepa aliba lokti den o jembiba mapang Rio-i, Council Hall yanglutsü atema tenla tajung agütsüba atema Sechii Zubza nung alirtem dang pelaba lemsatep.

Rio-isa, lokti nung yimjung aser telongjem dang lira ajak takoktsü, ta ashi. Paisa, nüburtem dang maneni lenla ajak nung terenlok atema longjemer alitsü ayongzük.

MLA Keneizhakho Nakhro aser Western Angami Public Organization (WAPO) tir Kevisekho Chiicha natia sentong nung o jembia liasü.

Iba sentong ya organizing committee convenor Neidilhoutuo Sechii lenisüba kübok agi aser Sechii Zubza Village Council chairman Mhasikhotuo Zhiinyii-i lokti pelaa agizükba o jembi aser Building Committee convenor Khriengulie Kuotsu-i tepela anküp o jembia liasü. Nagaland youth resources & sports advisor Er. Zale Neikha aser Nagaland technical education & election advisor Medo Yhokha nata iba sentong nung dena liasü.

Sentong nung o jembiba mapang Rio-i Sechii Zubza takaratiba nung jila kümdaktsütsü yongyaba lemsatep. Pai, yimdak lenirtem aser shisakartem dang Sechii Zubza ya jila kümdaktsütsü atema khen bilemdangtsü ayongzük.

Sechii Zubza yakta jila kümdaktsütsü jangraba lemsatepba mapang Rio-i, urban local bodies kümtetba sülen Sechii Zubza nung alirtem terenlok tsütsü maongka aika angutsü, ta ashi.

Sechii Zubza ya shishilembadak tongtibang ka akümtsü temsüa lir, kechiyong iba ya National Highway nung lir aser iba tesem nung Railway Station yanglutsü atemaa benoka lir, ta pai ashi. Iba tesem ya shisa muludak tesem ka kümtettsü, ta pai shisem.

Maneni Rio-i, Nagaland nung district HQs ajak nung aluyimertem atema shishilembadak lapoktsütsü state sorkar sentong aliba lemsatep.

Iba ajanga aluyimertem nem parnoki tsünütetba ayoktsü atema maongka agütsütsü.

Rio-i ashiba agi, COVID-19 wara ajanga asenok ajak nem aluyimba aser allied sector tem nung temulung agüja inyaka pei poksüng aazüktsü atema tangazükba tajung ka agütsüogo.

“Asenok ya adokdaktsüba lokti ka masü saka achiba lokti ka lir,” ta Rio-i shia shishilembadak chiyongtsütem talila adokdaktsütsü mapang tongja tongogo, ta ashi.

Paisa shishilembadak takhangbatema temulung dang ayutsü nüngdaker, ta shisem. CM-i, Nagaland nung

Arogotemi lokti nung temelenshi atema ajungmesodaktsüner aser Naga nunger lokti nung mapa meranga inyakba sobaliba tanaben asüngsashidaktsüner.

Chief minister-isa, nisung ajaki tangar dak metaloker aliba yimya toktsür mapa meranga inyaker chiyongba yimya benshitsüla, ta ashi.