CM T.R Zeliang-i Dimapur nung gari lenmangtem reprangshi

Dimapur, August 12 (TYO): Tanü Nagaland Chief Minister den par cabinet minister tem aser Parliamentary Secretary temi Purana Bazaar nungi tenzükba National Highway aser town area nung gari lenmangtem repranga senzü.
Purana Bazar nung Trained Youth of Year of construction workers (YoCW)-i rongdak süa mapatem inyaka liasü.
Chief minister den pa meinertem Purana bazaar nung khen anen aser lanurtem den jembia liasü, aser iba mapang nung YoCW-i chief minister dang ano lenla balala nung parnok nem skill training agütsütsü mepishia liasü.
Iba sülen osangbenertem den jembidang Zeliang-i, 2016-17 küm ya ‘Year of construction workers’ ta sangdongogo, ta metetdaktsüba den külemi sorkari training balala atema aser uniforms alitsü atema senotsü agütsüogo, ta metetdaktsü.
Tang tashi nung district 9 ayimjenogo, ta paisa ashi.
“Lanurtemi dang mapa inyaktsü mulungtetra nüngdakba mapang nung senotsü agütsütsü, iba den külemi nenoki koba training aginerar ibaji jangjatsüla,” ta paisa metetdaktsü.
Zeliang-i, training agir aliba lanurtemi training agitsü tasenpurtem nema training agütsütettsü akok, ta ashi.
Zynorique nungi Trainer, Kevitsu Doze-i, Independence Day amongba sülen tanüngba district ana- Kohima aser Longleng nung training agütsütsü, ta metetdaktsü.