CM tenangzükba sentong nung adentsü atema Nitish-i PM jaok

Patna, November 18 (Agencies): Hokolbar nü Bihar chief minister tenangzükba agitsü alisang Nitish Kumar-i Bodhbar nü Ato kilonser Narendra Modi CM tenangzükba agiba sentong nung adentsü atema jaokogo.

Kumar-i Ato kilonser Modi den telephone ajanga November 20 nikongdang 2:00 ako nung tenangzükba agiba sentong anung adentsü atema jaok, ta chief minister’s office ajanga ashi.

Anogo pezünü Chhath benjung tanep atemba sülen Kumar-i telephone ajanga pa tenangzükba agiba sentong nung adentsü atema tongtibang lenirtem jaoka liasü.

Iba dak sentakba nung Bihar JD(U) Tir, Basistha Narayan Singh-i, Ato kilonser jaokbaji yimya awashi sayuba dang, iba sentong nung pa adentsü mesüra madentsüji pa melung, ta ashi.

Osangbenertemi tasüngdangba ka langzüdang Bihar BJP tatong Tir, Sanjay Mayukh-i, Ato kilonser jilia sentong kar yanglua lir, anungji pa iba sentong nung medentettsüa akok, ta ashi.

Paisa, ajisüaka Centre sorkar tenüng nung parliamentary affairs minister Venkaiah Naidu aser minister of state (Independent Charge) Rajiv Pratap Rudy nabo tenangzükba agiba sentong nungji adentsü, ta ashi.

Chief minsiter’s office ajangasa, Kumar-i Union home minister Rajnath Singh, finance minister Arun Jaitley, external affairs minister Sushma Swaraj densema Central minister tema kar jaokogo, ta metetdaktsü.

Ano State Congress Tir, Ashok Choudhary-ia, iba sentong nung party tatong Tir, Rahul Gandhi-a adentsü akok, ta shiogo.

Iba dak alia Bihar CM tenangzükba agiba sentong nung West Bengal chief minister Mamata Banerjee, Delhi chief minister Arvind Kejriwal, Assam chief minister Tarun Gogoi aser Uttar Pradesh chief minister Akhilesh Yadav nungera adentsü imlar, koba ajanga linük nung opposition party tem telongjem sayutsü.