CM Yogi Adityanath-i BRD hospital semdang; asür 79 jungogo

New Delhi/Lucknow, August 13 (Agencies): Deobarnü Uttar Pradesh Chief Minister, Yogi Adityanath-i Gorakhpur nung aliba Baba Raghav Das Medical college hospital semdangogo; pa den Union Health Minister, JP Nadda-a liasü.
Tanüa iba hospital nung tanur 16 tashi süogo aser ajak senteperbo anogo ishika tsüngda iba hospital nung tanur 79 tashi süogo.
Osangbenertem den jembidang Chief Minister-i, pai minister tem dang iba hospital nung oxygen maliba agi tanur tem asüba kuli tejangja bushitsü aser aibelener nem temerenshi agütsütsü tuyuogo, ta metetdaktsü.
Chief Minister Yogi-i, “Onoki BRD Medical College nung principal mapa nungi anentsüogo aser pa anema bushisüngdang tenzükogo. Aibelener shinga danga tai matoktsü,” ta metetdaktsü.
Chief Minister-isa, magisterial inquiry atema tuyuogo aser iba tatalokba bushisüngdangtsü atema committee ka tentetogo, ta metetdaktsü.
Ano külen item tatalokba nung ajemdaker Opposition-i state sorkar aitsüba den külemi party ajak nungi züngsemtemi akumba luden kati iba tatalokba bushisüngdangtsüla, ta takhangba agütsü.
BRD hosopital nung tanur 70 dak tema asübaji state nung Bharatiya Janata Party (BJP)-i aniba sorkar tai ajanga lir, anungji Yogi Adityanath-i Chief Minister menden nungi anentsüla, ta Congress Party-i metetdaktsü.
Lucknow nung osangbenertem den jembidang state Congress Tir, Raj Babbar-i, “Iba sorkar ya nisung tepsetertem lir. Item tanurtem ya asüba masü saka tepsetba lir. Ano taaktsü kaji, iba ya Yogi Adityanath’er constituency nung atalokogo. Pai par constituency-i nüngdakba-a repranga meinyaktetra pai Uttar Pradesh ama state tulu khuret koma abentsü? Pai pa menden nungi tangsa anentsüla,” ta ashi.