CM Zeliang-i ‘Beti Bachao, Beti Padhao’ sentong lapoktsü

Kohima, October 13 (TYO): Mongubarnü Chief Minister, TR Zeliang-i Nagaland nung Beti Bachao, Beti Padhao (Save the Girl Child, Educate Her) sentong lapoktsüogo.
“Asen tetsür chanutemi ajuruba khuret aser parnok lokti nung ajemzüka amshiba inyakyim koktettsü atema iba sentong ya tongtibang lir” ta TR Zeliang-i sentong lapoktsüdang ashi.
Iba mapa ajanga tetsür asotsü ajungmesor aser ano child sex ratio (CSR) jenjang mejungi aliba jungdaktsütsü atema nükjidong lir, ta paisa ashi.
Naga nungertemi tanur asotsü ta asüdang tebur ang sodaktsünüasa bilemer saka kasa mapang nung asenoki tanur tebur-tetsür mebendanger. Nagaland ama teburi senmang amangba loktitem nung tanur tebur ang aginüba tangatetba lir, ta TR Zeliang-isa ashi.
Naga nungeri tanur tepok nung bena alidang tetsür asüba atema raksa endokba osang kodanga mangashidang. Ajisüaka Nagaland nung child sex ratio aginüba jenjang nungi teküpokba nung lir. Iba khuret atema doctor temi kanga junga shisadangtsü nüngdaker, ta paisa shisem.
TR Zeliang-i ashiba agi, 2011 Census report nung Longleng district nung CSR 885 ajema akümba bushitet saka 2001 Census nungbo CSR 964 liasü. Anungji, Health & Family Welfare Department-i Census report nung aibelen ali asü mali bushisüngdangtsüla.
Teburi senmang amangba loktitem ama Nagaland nunga tetsür dang nungibo teburtem ang shisaluyimba nunga maongka tuluba agütsür. Ajisüaka iba tangatetba ya sama odar aser iba asoshi pela bilemer. Sakasa, yimtsüng tia nung aliba tesemtem nung tanur tebur ang aginüba tangatetba lir aser asenoki item amala tesem nung “Beti Bachao, Beti Padhao” sentong inyaktsüla, ta Nagaland chief minister-isa ayongzük.
Iba mapa takok angutsü state task force aser district task force amalitep lia inyaktsüla aser tongtibangtibaji sex ratio jenjang ajungkettsü atema asütsüla. Iba sülen achiajem shitak agütsütsü, school & secondary education nung tetsür kaketshirtem renlokdaktsütsü, health facilities tajungba agütsütsü aser tetsürtem lendong nungi jenbua alitsü atema tensa yanglutsü atema asenoki inyaktsüla, ta paisa ashi.
“Asenoki tanur tebur asodang pelatepba ama, tanur tetsür asodanga pelatsüla. Asenok ajaki tanur tetsür taküm liyonga aotsü, kümzüka ayutsü aser la shisaluyimtsü atema bilemtsütsüla” ta TR Zeliang-isa ayongzük.
Tanü agiba sentong nung Chief minister-isa Ambassador for Girl Child badge sayatsü.
Sentong nung mendenji Secretary of Social Welfare, Dellirose M. Sakhrie liasü, Social Welfare Minister, Kiyaneilie Peseyie-i okila jembi aser Director Social Welfare Merangtsungba Aier-i anküp tepela o jembi.
Iba sentong ya State Resource Centre of Women Project Management Unit-i Department of Social Welfare den yaritepa ayongzük.