CM Zeliang-i ITI Kohima nung upgraded diesel mechanic trade lapoktsü

February 10, 2016 nü ITI Kohima nung Nagaland Chief Minister, TR Zeliang aser NSDC Chairman, S. Ramadorai na dang Upgraded Diesel Mechanic Trade indang rasa-a ashidang agiba noksa angur. 

Kohima, February 10 (TYO) : Prime Minister indang ‘Skill India’ aser ‘Make in India’ tangatetba nung ajemdaker Nagaland sorkari Bodbarnü Government Industrial Training Institute (ITI) Kohima nung Upgrading of Diesel Mechanic Trade lapokba ajanga Public Private Partnership mapa tenzük.
Automotive Engineering nung Public Private Partnership ji Department of Labour & Employment, Skill Development & Entrepreneurship, Nagaland aser TATA Motors tsüngda lir.
“Skill development dak sendakba nung Corporate India den tesentaktep mezüngbubaji iba ya lir” ta tanü Nagaland Chief Minister, TR Zeliang-i ashi.
Tanü National Skill Development Corporation Chairman, S Ramadorai lia TR Zeliang-i Upgraded Diesel Mechanic Trade lapoktsü.
Iba ya ajanga Nagaland nung lanurtem employees mesüra entrepreneurs ama mapa angudak ka asütsü imlar, ta TR Zeliang-i ashi.
“Naga nunger lanurtem asoshi skill development aser vocation education kanga tongtipang kümogo aser sorkar mapatem agi dangbo employment khuret mekoktettsü. Naga nungertemi sorkar mapa dak alia bilemtsüla” ta paisa metetdaktsü.
Nagaland nung industry maliba, rongsenren tsütsü inyakyim balaka maliba aser yimtitem nungi talangba pilar aliba ajanga sorkar mapa dak alaka tanga mapa angudak peria mali, ta Nagaland chief minister-isa metetdaktsü.
“Prime Minister’er Skill India Mission takok ngua inyaktettsü atema asenoki industry tem den tesentaktep ayutsü nüngdak” ta TR Zeliang-i ashi aser paisa tanga sector tem nunga ibala tesentaktep ayutsü atema ayongzük.
Chief Minister-isa NSDC Chairman Ramadorai dang state sorkari nüngdakbatem aser tebilemtsü khurettem lemsatepdang, skilled workers adokdaktsütsü aser ano industrial production jenjang tajungba kümdaktsütsü asoshi Nagaland nung aliba it is nung technology tasen ajanga infrastructure renlokdaktsütsüla, ta ashi.
NSDC-i Jamur & Kashmir nung ‘UDAAN’ sentong balaka tenzüktsüba ama North East State tem atema sentong balaka atonga inyaktsüla, ta TR Zeliang-isa mepishia metetdaktsü.
Tan session nungi Tata Motors-i Naga nunger lanurtem asoshi automotive motors course balala agitsü.
NSDA & NSDC Chairman, S. Ramadorai-ia iba sentong nung o jembidang, ITI, Kohima nung Diesel Mechanic trade ajanga nübortem dang skills sayutsü imlar, ta ashi.
Paisa ITI nung kaketshirtem dang meranga inyaktsü aser facility tem tajungtiba nung amshitsü atema ayongzük.
Chief Minister-i mepishiba nung ajemdaker Dimapur nungi Delhi (Guwahati adena) tayimtsü senzütsü tebilemba Aviation board den lemsateptsü, ta S. Ramadorai-isa ashi.
Iba sentong nung Labour & Employment, Skill Development & Entrepreneurship Parliamentary Secretary, Mmhonlumo Kikon-i tarurtem pela agizükba o jembi aser TATA Motors nungi ketdangser kati PPP project indang metetdaktsü.
Sentong nung mendenji Commissioner & Secretary, LE&CT, E.M. Patton liasü, Consultant, Tata Motors, S.P. Joshi aser Chairman, North-East Advisory Council, R. Barthakur nati o tatsütsü jembi aser Director, E&CT, Muthingyuba Sangtam-i anküp tepela o jembi.