CM Zeliang-i Kisama Naga Heritage Village exit road lapoktsü

November 30, 2015 nü Kisama Exit Road lapoktsüba sülen Chief Minister TR Zeliang den Cabinet züngsemtem aser ketdangsertem külemi agiba noksa angur.

Kohima, November 30 (TYO): Nagaland state renloktsü atema ali kiburtem aser sensosangertemi sorkar den yariteptsüla, ta Nagaland Chief Minister, TR Zeliang-i ashi.
Phesama aser Kisama tsüngda Kisama Naga Heritage village Exit Naga road lapoktsüba sentong nung TR Zeliang-i iba tayongzükba o jembi.
Phesama yimeri iba gari lenmang yanglutsü atema sorkar nem ali angati tenla agütsüba atema chief minister-i parnok dang pelaba metedtaktsü.
State yimtiba Kohima, nung tzü tajemtsü mesür arutsü atema state sorkari temeket aliba yimtsüngtem dang nungi temelaba meshia asüngdangogo, aser yimtsüng kari mulungsoa yariteptsü shiogo, ta TR Zeliang-isa ashi.
“Naga nunger ali kibur inyakyimji balaka saka asenoki nübortem ajangzüktsü, terenlok angutsü aser tejakleni aotsü atema bendanga agüja yaritepra, smart city mangdangji asangsang nung ataloktsü” ta paisa shisem.
Chief minister-isa, Phesama village aser Department of R&B nem gari lenmangtem yangluba atema pelaba metetdaktsü.
Iba sentong nung Road & Bridges Minister Vikheho Swu, Local MLA Vikho-o Yhoshu aser Angami Public Organisation President, Vilhousa Seleyi nungeri o jembi.
Sentong nung mendenji Commissioner & Secretary Works & Housing Department, I Himato Zhimomi liasü aser Phesama Baptist Church Pastor, Rokovilie Zashumo-i temoatsü meshia sarasadem.