CMA-i sorchiok tetoktepba ayongzük

Phek, Chiteni/July 22, 2022 (TYO): Akhi tetsü-tebo mapang nungi sorchioka aruba (indigenous cooking) yimyatem ajungkettsütsü nükjidong nung, Chakhesang Mothers’ Association (CMA)-i Bodhbarnü (20.07.2022) Phek Town Hall nung sorchiok tetoktepba ayongzük, ta sangdong ka ajanga metetdaktsü.

Iba tetoktepba den repsema Chakhesang kin aon (dish) asoba yimyatem züluoka ayuba aser sangdongba; aser Chakhesang kin sobaliba sobusülemtsü tem sayaba sentong agi, kong alakteta tejaoker ama MLA aser NPF Legislature Party, lennir Kuzholuzo (Azo) Nienu dena liasü.

Iba sentong nung Nienu-i, temang anema alitsü asoshi asenoki chiyongtsü shitak/tajung achi-ajemtsü nüngdaker, koba asen tetsü-tebo mapang nungi item inyakyim benshia aru, ta ashi.

Akhi mapang asen tetsü-tebo temi chia – jema aruba chiyongtsütem ajungkettsütsüla kechiyong item chiyongtsü achitsü ajungba den külemi temang nunga teyari agütsür, ta pai telok ajungshia liasü.

Phek Deputy Commissioner, Razouvolie Dozo, NCS-i, Chakhesang kin aon (dish) asoba yimyatem züloka ayuba atema organising committee dang pelaba lemsatep aser pai ashiba agi, iba sentong ajanga sorchiokba yimya aser tasatem tajungba melenshitsü ajungmesoba den  pei kin sorchiokba inyakyim aser sobaliba tali jangjatsü asoshi maongka tulu agütsü, ta ashi.

Iba sentong nung CMA Publicity & Information Secretary, Wezope-u Elah menden liasü. CMA President, Zhonelü Tünyi-i okila jembi aser CPO President, Vezuhu Keyho-i telok pela  agizük.

Chakhesang Mothers Association-i ayongba sorchiok tetoktepba nung tetendangertemji Vechisalü Nukhu, Advisor CMA; Dukhrulu Lohe, Project Officer, DRDA Phek; Neingupe-u K. Rhakho; Kekhrongulo-u Kapfo, taoba mapang  NMA Treasurer; Mütünülü Keyho, Naga Chef, Season 8th winner; Vesupra Kezo, Superintendent of Police, Phek, Nagaland aser Vekhosayi Nyekha, President, Tenyimia Union Dimapur nunger liasü.

Maneni, iba sorchiok tetoktepba nung Pfutsero Town Mothers Association-i mezüngbuba jenjang nung takok angu aser parnoki senpet 30,000 agizük. CPO ajanga iba senpet atema tenla agütsü. Secheku Mothers’ Welfare Society-i tanabuba jenjang ajangzükteta senpet 20,000 angu, Khuza/Kezha Area Mothers’ Association-i tasembuba jenjang ajangzükteta senpet  15,000 aser Chakhesang Women Society Kohima-i pezübuba jenjang ajangzükteta senpet 10,000 angu, ta kasa sangdong ajanga ashi.