CMHSS nung mezüng Naga headmaster Asür Guizang Meru sür küm 100 ajungba bilemteta amung

CMHSS nung Naga nunger mezüng headmaster inyaksang Asür Guizang Meru Zeliang sür küm 100 ajungba sentong ka agir külen tetushi tesemdanger Advisor Namri Nchang den tongti shilem agirtem külemi tangokba noksa nung angur. Mokokchung, November 20, 2018.

Mokokchung, Yimpoksüi/ Nov 20 (TYO): Clark Memorial Higher Secondary Impur nung mezüng Naga nunger Headmaster Asür Guizang Meru Zeliang sür küm 100 ajungba bilemtetmung sentong tulu ka CMHSS auditorium nung ayongzüka pa nem akhüm tetushi agüja mungogo.
Tanü iba sentong nung Special Guest, Water Resources Advisor, Namri Nchang-i o jembidang, Asür Guizang Meru aser par kibongi Tsüngremer tajaba meteta pei lima toktsür Impur-i arua nüburtem tenzükba, talisa Aor nem education perokba maparen nung shilem agiba ya bendanga agütsüba mapa ka lir, anungji, iba asoshi pa aser par kinungertem nem akhüm tetushi agütsür, ta ashi.
1870’s mapang Ao limai Dr. E.W Clark lenisüba nung mezüng Christian missionary-tem tetsüng ajemoka Nagaland nung arogo balala tenzüka ao. Tanü asenoki meyipa reprangdangra Tsüngremer temoatsüji Ao kin madak adenba kuli aika angur. Aorji luyim aisü nung tangar dang nungi tejaklen lir, item ajakji Aori Tsüngrem meimba aser Pa dang tashi angaba ajanga lir. Yamaji, tarutsü nunga iba ama mapa tajungji maneni inyaktsü imlar, ta paisa Ao kin tenüng sanga metetdaktsü.
Mezüngpuri iba school ya tarutsü lanu putu dak rangloker tenzükba asoshi parnok danga pelar. Mezüng tenzükdangbo timtem toushi jenti ajurur alitsü ta asen nükdang yimdangi arur. Ibai Ao kin asoshi dang masü saka Naga kin songjen asoshi nükla yur tenzükba mapa ka liasü ta rajemer, ta paisa ashi.
Paisa school tanurtem dang tayongzük o kar lemsatepdang, tanü alima ya tetoktepba agi süngogo, anungji, chichiba education medeniang asenoki takok kecha mungutettsü. Tanü alima ya tazüngertem meyong lir, degree balala angubaji tongtibangba masü saka lokti nung temelenshi aser alima tajungba akümtsü asoshi chichiba education-ji tanü alimai aginür aser aji tang rongdak nungdakji lir, ta ashi.
“Nai Nagaland tajungba, temelenshiba, terenlokba aser yimjung lima ka kümdaktsünüra pei azüngba luyim balala nung takok ngua aser chichiba education ajangzüktsü asoshi merangtsüla. Item ajakji; tesayur dang tashi angaba, khuret meteta inyakba, tsürabur ashi angaba, amajok nung mapang meintoki alizüng mamatoki ayuba aser ajak dang alia nai inyakba ajak nung Tsüngrem tama südaktsütsübaji kanga tongtibang lir”, ta paisa shisem.
“Ni ya backward district ka nungi aru, anungji, ni Aor dang mepishiba kaji; nenoki akokba tashi lenmang balala ajanga ozü nüburtem den koda nenoki Asür Guizang Meru den temeim benshia aru, yamaji maneni inyakdaktsünür”, ta paisa ayongzüka liasü.
Tanep iba sentong metenzükdang pa indang leper semdanga pa nem akhüm tetushi agüja liasü. Asür Guizang Meru Zeliang ya 15th June, 1894 küm aso aser 4th November 1918 küm iba lima nungi pilaa ao. Pa ya CMHSS nung 1915 nungi tenzüka headmaster mapa inyakdang asü aser pa mang ya Impur leper nung rema lir. Pai headmaster mapa ya pa arishi küm 21 asüdang agizük. Pa ya Naga lima nungbo headmaster inyaker rongnung tanubuti asütsü, ta aikati bilemer.
Iba sentong nung Asür Guizang Meru’er kinunger, Mokokchung ADEO Akala, Law & Justice, Border Affairs & Treasuries & Account Advisor Dr. Longri, Mokokchung ADC W. Manpai Phom, AKM senior executive Yanger Jamir, ABAM executive secretary Rev. Dr. Mar Atsongchanger, ABAM education & literature secretary T. Apok Jamir, Rtd. IAS Thangi Manen, CMHSS Principal Chubainla parnokia shilem balala agia liasü. Imtilong Aier-i asür Guizang Meru nem mejemtsüba ken ka aten aser CMHHS nung azüngertemia telok ken tajung ka aten.