CMO-i Mmhonlumo Kikon onük meyiptsür

Dimapur, November 2 (TYO): November 2, 2016 nü osangkakettem balala nung MLA Mmhonlumo Kikon Parliamentary Secretary menden nungi anentsüba atema osang adokba atema Media Cell, Chief Minister’s Office, Nagaland-i sangdong ka nung iba onük meyiptsüogo.
India Linük Temzüng nung aser Parliamentary Democracy ka inyakyim nung Minister ka shimtsüba mesüra anentsütsübaji Chief Minister dak keta lir aser iba nung Parliamentary Secretary aser Adviser tem dena lir, ta Media Cell sangdong nung shia lir.
Chief Minister kati iba ama mapa inyakba atema kuli agütsütsü tetuyuba kecha mali. Anungji, Mmhonlumo Kikon, BJP MLA Parliamentary Secretary menden nungi anentsüba atema kuli agütsütsü nüngdak madoker, ta Media Cell, CMO-isa ashi.
Yimten telok kati par züngsem ka Minister, Parliamentary Secretary, Adviser mesüra MLA nungi anentsütsü mesüra züngdoktsüsa kümra, iba nisung jagi pa medentsü atema mesüra pa aitsüba onüktem kuli agütsütsü atema tamasa pa/la nem show cause notice ka agütsür. Ajisüaka, Council of Minister nungi Minister, Parliamentary Secretary, Advisor ka anentsübaji ‘disciplinary action’ masü, anungji State mesüra Centre nunga kuli magütsüteper, ta Media Cell, Chief Minister’s Office sangdong nungsa metetdaktsü.