CNN Heroes of the Year sempet atema Indian-American ana densema lir

Washington, December 08 (Agencies): Indian American ana – Pittsburg nungi Samir Lakhani aser Texas nungi Mona Patel – ya CNN Heroes of the Year sempet agütsütsü asoshi finalists 10 rongnung densema lir.
Iba sempet ka küm shia December 17 nung agütsür aser Pittsburg nungi Samir Lakhani aser Texas nungi Mona Patel na ya finalists nung lir.
Cambodia ajunga nung aliba hotel tem nungi sapon amshir indokbatem Lakhani-i yanglushir yimdaklir nem angadi lemtsür, ta CNN ajanga ashi.
2014 küm Lakhani ya college azüngba mapang Cambodia semdanga liasü aser Cambodia nung sapon ya taka-taiter indang oset ka lir, ta jangjatetba sülen iba mapa ya tenzük.
“Tanur tetsü kati la kinü tanur sozükli ka süoshi shidokba powder agi temang shidoktsüba anguba ni jangja bilemteter. Iba noksa ya kodanga kü melung nungi mesamatsü,” ta Lakhani-i ashi.
Lakhani ya University of Pittsburgh nung azüngba mapang Eco-Soap Band tenzük, ta osang ajanga ashi.
Iba telok ya tang bo Cambodia nung recycle centre pezü lapoka lir aser iba tesem nung aliba tetsür 35 nem mapa agütsür.
Amshir aliba sapon tem ya meriktettsü aser tasen küma yanglushitsü mesüra ‘liquid soap’ küma yimsa yoker.
Iba telok indang sapon aser merekmejua alitsü indang tesayuba agütsüba ajanga nisung 650,000 dak tali ajangzükogo, ta Lakhani-i ashi.
“Ni iba maparen jung jangratemba ya long ka agi ozü asem inzüka yokba ya lir. Onoki ali nungi jana agiener, iba tesem nung alirtem nem mapa agütsür aser linük nung tesem ajungai sapon prokshir,” ta Lakhani-i ashi.
Mona Patel indang taa melie inyakba maparen nung tetsüng teben malir nem parnok indang taküm tasen küma yanglushija peer support, oset balala agüja lokti nung shilem agiba mapa tem agütsür.
San Antonio Amputee Foundation ajanga tetsüng teben malir nem taküm tasen agütsüba nung yarir. Iba telok ajanga peer support, education aser lokti balala nung shilem agitsü asoshi maongka agütsüba den külemi parnok alitsü asoshi ki yangluba nung senotsü teyari agütsür, garitem yanglushitsür aser teyangluba tetsüng aser teben agütsür, ta osang ajanga ashi.
Ita shia tetsüng tepen maketer 30 nungi 60 tashi külemi adenshia parnok taküm otsü lemsateper aser taküm kuli lemsatepa parnok taküm nung tasü taitba akümer, ta kasa osang ajanga ashi.
“Kodang nisung ka tetsüng mesüra teben samar, pa taküm anishitsü ya tetsübutsüka akümer,” ta temokok tsünglanglen rangdoker alila Patel-i ashi.
“Tetsüng teben malirtem yaritsü asoshi ni tenzükba ya nia iba jenjang nung aliba ajanga lir,” ta lai shisem.
1990 nung la ya Cal Poly University-i aoba mapang yijemer driver kati ania aliba gari agi la dak atsük. Iba mapang la arishi küm 17 tain liasü.
“Iba mapng ni azükleni feet 12 jungnüa atu. Aser pa indang gari aser yin agi yangluba railing ka tsüngta ni mejepok aser iba mapang kü tetsüng raksa,” ta Patel-i CNN dang ashi. Iba sülen Patel taküm teti asoshi tesama tia kati ayi.
“CNN Hero of the Year” atema nüburtemi online ajanga vote agütsütsü aser iba takok angur nem senpet sen USD 100,000 agütsütsü.