CNSA-i CNTC, CIC aser SIC nem tenüngsang agütsür

Dimapur, March 23 (TYO): Central Nagaland Tribes Council (CNTC) state jenjang nung telok ka akümba atema Central Nagaland Students’ Association (CNSA)-i tenüngsang agütsür, ta tir, Charles Lotha aser tongti tezülur, Yimlanger Jamir nati sangdong ka nung metetdaktsü.
CNTC-i Naga nunger tarutsü jenjang yanglutsü atema meranga inyaktsü imlar aser Naga nunger asoshi inyakba mapa nung CNSA-i CNTC nungita yaritsü, ta CNSA mendenpurtem metetdaktsü.
CNSA sangdong nungsa, Toshi Aier IAS (Rtd. Chief Secy.) Chief Information commissioner (CIC) aser Er. Chanbemo Lotha (Redt Chief Engineer (H) State Information Commissioner (SIC) inyaktsü shimba atema tenüngsang agüja lir.
State information commission nung takotet nisung ana shimokba ajanga public aser sorkar agency tem tajangzük tulu angutsü aser telok balala tsüngda tesentak tajungba akümtsü, ta Charles Lotha aser Yimlanger Jamir nati sangdong nung shia lir.
Tena ajanga state information Commission Office-i alizüng tonga inyaktsü imlar aser tarutsü wadang atema lennir ana asoshi sarasademtsür, ta tenatisa metetdaktsü.