CNSA-i NSF dang kuli meshir

Dimapur, February 26 (TYO): Naga Students Federation (NSF)-i Nagaland state nung backdoor appointments inyakba anema ola adokba pelaa agizüker saka kasa mapang nung Nagaland state nung madenba nisung aser teloktemi Nagaland sorkar amokmerena züluba atema mepelar, ta Central Nagaland Students Association (CNSA)-i metetdaktsüogo.
NSF-i Nagaland state sorkar nem Ultimatum agütsübaji Nagaland nung Naga nungerbo shisatsü mali ama sayur. Anungji, NSF-i kechiba Nagaland nung Naga nunger tesentaktep kecha maliba tangartem amshia Nagaland sorkar nem iba Ultimatum agütsü’ar kuli agütsütsü metetdaktsür, ta CNSA-isa ashi.
“Naga nunger pei sasa ketdangsütsü aser nüjiso tenüng nung Nagaland nung aliba Naga nunger mapang talangka amokmerena aser mezüngmeshia aruogo. Anungji, arrtsü adener oa alirtemi Nagaland state maparen nung teka amoukba ya Naga nunger atema tetsükdaktsü ka lir ta asenoki angatettsüla. Iba ajanga tongti telok kar mapang ka tashitait liasü, saka tanübo mali ama kümogo aser item telok ya loktiliba den meputep ama züngshir” ta CNSA-i metetdaktsü.