CNSA-i state sorkar dang RMSA tesayur shimba atema telangzüba meshir

Dimapur, December 22 (TYO): Tawa Rashtriya Madhyamik Shiksa Abhiyan (RMSA) results adokba nung Ao, Sumi aser Lotha oshitem atema tesayurtem sangdongba dang nungi kanga agi tajemba shimba atema süoki ia bilemer, ta Central Nagaland Students’ Association (CNSA) sangdong ka nung metetdaktsü.
December 15, 2015 nü Ao Senso Telongjem Dimapur (ASTD)-i iba inyakyim atema sorkar dang anogo 30 tsüngda telangzüba agütsütsü atema mapang atakzüktsübaji kanga shitak inyakogo. Ano, Central Nagaland Tribes Council (CNTC)-ia December 20, 2015 nü iba onük atema kanga dang jangjajangja metetdaktsüogo, ta CNSA CNSA President Charles Lotha aser General Secretary Yimlanger Jamir nati sangdong nung ashi.
“Nagaland Education Mission Society, Rashtriya Madhyamik Shiksa Abhiyan, Nagaland, Kohima-i kodaser Ao oshi subject tesayur mapa 20 atema candidate 26 nungi nisung 5, Sumi oshi subject tesayur 9 atema candidate 27 nungi nisung 8 aser Lotha oshi subject tesayur 10 atema candidate 14 nungi pezü dang shim ta Central Nagaland Students’ Association-i kanga rata bilemer,” ta parnokisa ashi.
Iba inyakyim nung tim mesüi inyakba kar lir aser itemji CNSA-i süoki ia reprangdar. December 17, 2015 nü Nagaland sorkari osangkaket nung sangdong ka metetdaktsüogo saka iba nung temulung masür.
“Ao, Sumi aser Lotha oshitem atema candidate tem noklang nung shilem 45 mesüra tema angur peria maliasü ta Nagaland sorkari sangdong nung metetdaktsü. Sürabangla, kechiba item ‘unqualified candidates’ indang applications mezüngyongi agizük aser tatidang agütsüdaktsü. Parnok mapa nung shimoktsü atema marks peria mangu süra, osangkaketem nung iba osangji mezüngi kechiba metetdaktsü(?)” ta CNSA-isa asüngdang.
December 17, 2015 nü sorkar sangdong nungsa, tanüngba mapatem indang advertise asütsü ta shia lir. Anungji Nagaland Education Mission Society, RMSA-i tekaratiba nung mapa tazüng aliba indang osang metetdaktsütsüla.
RMSA scheme ya centrally sponsored scheme ta CNSA-i kanga junga meteta lir, anungji state sorkari kuli tejangja magütsütetra iba onük ya onoki Centre sorkar dangi abentsü, kechiyong RMSA tebilemtsü khuret ajanga Naga nunger kaketshir aser shisashirtem taküm, wadang aser shisaluyimba nung tetsükdaktsü ajurur, ta CNSA mendenpurtemisa sangdong nung shia lir.
Nagaland sorkar aser talisa education department-i khuret süa mebilemba yimya ya magizüker. Anungji Central Nagaland Tribes Council (CNTC)-i anogo 30 tsüngda telangzüba agütsütsü mapang atakzüktsüba nung CNSA-ia pusema nungiter, ta mendenpurtemisa metetdaktsü.