CNSA-i Yajang aser Ralan nung arrtsü tesemtem semdang

Dimapur, July 23(TYO): Central Nagaland Students’ Association (CNSA)-i official tour mapatong dak sentakba nung All Sumi students union (SKK), Lotha Students’ Union (LSU) aser Ao Students’ Conference (AKM) dena July 22 nü, Mokokchung kübok Yajang yimtsüng anasa aliba arrtsülen mangatettep li aser July 23 nü, Wokha kübok aliba Ralan tesem semdangogo, ta CNSA sangdong ka ajanga metetdaktsü.
July 20, 2015 nü nungi tenzüka CNSA-i Wokha, Zunheboto aser Mokokchung sema jajadar. CNSA-i sema jajaba mapang Sumi, Lotha aser Ao’er kin lokti tentet tulutem den senden mena shisa lemsatepogo, aser iba mapang parnoki akokba tashi CNSA nüngittsü, ta shiogo.
Official tour tembanga CNSA den SKK, LSU aser AKM ketdangpur temi arrtsülen aliba Yajang aser Ralan tesem tem semdanga yangji aliba Naga nunger tem den senden mena liasü, ta sangdong ajanga ashi.
Yajang C yim nung council chairman-i CNSA züngsemtem anir ‘disputed area’ sema anir jaja, iba den külemi Yajang nung security sepai, NAP aser IRB tem dena ajurutepa sensak sema parnok tebilemba lemsatepogo, ta kasa sangdong ajanga metetdaktsü.
CNSA den kaketshr tentettemisa July 23 nü Wokha kübok aliba Ralan tesem atong aser Ralan nung Governor meyong camp nung senden ka amen. Iba mapang yimtsüng nung alirtemi takhangba kar agüja liasü. Yimtsüng nung alirtemi takhangba agütsüba nung, CNSA Tir Charles Lotha-i, iba arrtsü ken o ya tajuruteptsü tim telok den ajurutepa lemteptsü, ta ashi.
Ralan ya Lotha nunger meyong süaka ibai Naga nunger ajak meyong lir anungji Lotha kin akokba tashi agi yaritsü, ta CNSA nung tezülur Yimlanger Jamir-i ashi.
SKK Tir, Holuvi Chopy-ia, Ralan tesem nung paramilitary security peria lir aser tang ya raraba tongbang tensa ka mesüka lir anungji Nagaland Chief Minister aser tanüngba Minister temia iba tesem tia arua reprangdangtsüla, ta ashi.
AKM nung tatong tezülur S Shilukaba Longchar-i, Ralan tesem len alirtem atema shia bilemtsür. Ali ji asenok maitsü lir anungji ibaji samara asen maitsü-a samatsü, ta ashi.
Ao, Lotha aser Sumi kintem den item senden tem takok ngua agiba sülen parnoki iba official tour Dimapur nung tembangogo.