CNSA & Nagaland BJP-i Assam Rifles-i inyakba mapatem aitsür

Dimapur, October 28 (TYO) : Government of India aser Naga Political Groups (NPGs) tsüngda Ceasefire Agreement alema inyaksangshiba ajanga October 23, 2016 nü Okotso nung lendong atalok, ta Central Nagaland Students’ Association (CNSA)-i sangdong ka nung metetdaktsü.
India sorkar aser Naga yimten teloktem tsüngda ceasefire liaka, 28 Assam Rifles-i iba tasa ya atonga inyak. Naga yimten ken o angatetteptsü atema mapang ka nung, kodaser “Tenemlen alirtem asoshi Medemertem” ta ajar Assam Rifles-i cease-fire tenangzüktep akhüm metsübui iba mapa inyak ta CNSA-i asüngdanger, ta President, Charles Lotha aser General Secretary, Yimlanger Jamir nati sangdong nung shia lir.
Iba dak sendakba nung India sorkari Nagaland state nungi “Armed Forces Special Power Acts (AFSPA)” agientsü akhanger, ta CNSA mendenpurtemisa ashi.
Ano, Indian Army-i Mekokla Baptist Arogo ki nung tashiyim agi anenzükba aser tamangba ki mesenmetua amshiba inyakyim aitsür, ta CNSA-isa metetdaktsü.
Indian Army-i iba mapa inyakba ajanga Naga nunger temulung yirutsüogo aser iba ya Khristan yimsü anema inyakba mapa ka lir. Anungji, state sorkari iba onük süoki ia agitsüla aser tarutsü nung ibala tensa majurutsü atema Indian Army aser Ceasefire Monitoring Board den ken o benoka jembitsüla, ta CNSA mendenpurtemisa metetdaktsü.
BJP Nagaland-ia sangdong ka nung, Wokha district kübok Okotso yimtsüng nung Assam Rifles aser GPRN/NSCN tsüngda kahteptsüsa tensa atalokba atema sasa bilemba metetdaktsü.
Nagaland state nung alirtemi yimjung aser putepa alitsü aginüa alidang iba ama tensa atalokba atema sasa bilemer. Iba tatalokba sülen 28 Assam Rifles-i Mekokla Baptist Arogo tenla ki nung tashiyim agi anenzükba mapa aitsür, ta BJP Nagaland Spokesman, Yanghose Sangtam-i sangdong nung shia lir.
Tamangba yimsü ajak indang tekülem kitemji nisung ajaki akhümtsübula. Anungji, ketdangser temapurtemi 28 Assam Rifles ajanga mapa inyakba bushisüngdang asütsü ayongzüker, ta paisa ashi.
BJP Nagaland-isa armed forces aser Naga yimten telok ajaki public taginüba ama cease fire ground rules kübok anidaktsü mepishir, ta sangdong nungsa metetdaktsü.