CNTC & AKTD-i ACAUT rally pusema nungiter

Dimapur, August 22 (TYO): ACAUT Nagaland-i tanü sangdong ka nung Dimapur nung alitsü ayongba “25 August All Nagaland Public Rally” nung Naga nunger ajak arua adentsü ayongzüker ta metetdaktsüogo.

Iba rally mapang CNTC-i Town Hall, Super Market Complex, Dimapur nung parnok office control room ama amshitsü melaogo aser iba atema parnok dang kanga pelar, ta Media Cell sangdong ka nung metetdaktsü.

Ano külen, CNTC-ia sangdong ka nung 25 August nü Supermarket Dimapur nung ACAUT Rally pusema nungiter aser iba sentong nung akokba tashi yariteptsü ta metetdaktsüogo.

Tangatetba shitak aliba Naga nunger ajaki ACAUT pusema nungittsü mepishia metetdaktsür aser asenok külemi longjemer asen lima nungi ochimashi aser loktiliba nung ketdangsübaren meshitak alibatem agientsü ayongzüker, ta Media Cell, CNTC-i sangdong nungsa ashi.

Ao Kaketshir Telongjem Dimapur (AKTD)-ia sangdong ka nung August 25 nü ACAUT rally pusema nungiter ta metetdaktsü.

Nübortemi adokba ola Nagaland ajungalen prokshitsü mapang tongogo. Asenoki talangka aremzükogo aser tanü asen mulungsentsüi joko magizükteter, ta tir Lanutoshi Aier aser tongti tezülur Moayanger Jamir nati sangdong nung shia lir.

ACAUT-i ayongba sentong nung yimtsüng aser sub units ajaki nung züngsemtem arua adentsü metetdaktsür, ta mendenpurtemisa shisem.