CNTC aser Sumi Hohi-i ULB elections magizüker

Dimapur, January 11 (TYO) : Kin telok balalai magizükaka state sorkari ULB elections agitsü atema mapa inyakba ajanga tarutsü nung khuret aika bener arutsü aser itemji state sorkari indang tebilemtsü asütsü; Anungji, Nagaland nung tetsür nem shilem 33 lemzükja ULB elections magitsüla, ta Central Nagaland Tribes Council (CNTC)-i sangdong ka ajanga metetdaktsüogo.
Pei pei kin teloktemi lemtetba akhümtsübua candidate temi tenüng meyipa agitsü metetdaktsür aser Arrla 371 A nung Nagaland state atema kanga dang meranga meshizüka aliba temetentem magientsüla, ta CNTC-isa metetdaktsü.
Ano külen, Sumi Hoho-ia sangdong ka nung Zunheboto Town Council nung tenüng agüja aliba candidate ajaki tenüng meyipa agitsü atema tetuyuba agütsüogo.
Iba tetuyuba sülen manidakba candidate ajak Sumi loktiliba nungi küm 10 atema jentoktsü, ta parnokisa metetdaktsüogo.
Nagaland sorkari tang yanglua aliba Municipal Act meyipa mereprang tashi Sumi Hoho-i Urban Level Body Election maneni nokdangtsü. Dimapur district nung Sumi nunger aliba tesemtem nunga Western Sumi Hoho-i Central Nagaland Tribes Council aser Naga Council Dimapur den yaritepa Sumi nunger candidate ajak nem tenüng meyipa agidaktsütsü atema mapa nungloktsür, ta Sumi Hoho sangdong nungsa shia lir.