CNTC-i Angh dang ochimashi agientsü mepir; DDCF-i Dimapur Police aitsür

Dimapur, December 17 (TYO) : Central Nagaland Tribes Council (CNTC)-i Nagaland Angh, P.B. Acharya dang tawa Nagaland nung adoka aliba ochimashi onüktem atema mapa inyaktsü mepishia metetdaktsüogo.
Onüktem rongnung PDS jang tim mesüi amshiba aser totzü meyoktepba ken o tem nung tebang aitsü mepishir, ta Media Cell CNTC sangdong ka nung metetdaktsü.
Ochimashi agi sünger aliba state nung Nagaland Angh-i ochimashi anema nokdaker aser jembia arur aser pai item ochimashi tera nungi atsüteta endoktsü atema tongti shilem agitsüla, ta CNTC-isa ashi.
December 15, 2016 nü ACAUT rally timi agidang state sorkar tetuyuba kübok Dimapur Police-i tashiyim mapa inyakba kukua aitsür. Benjung mapang tenüng amer police-i tashi alia amshiogo aser 144 CrPc tim mesüi amshiogo, ta CNTC-isa metetdaktsü.
India Linük Temzüngi nübortemi timi adenshia lungkak aittsü temelaba agütsür. Nübortem temeten aser khuret metetdaktsütsü atema ibala sentong agitsü temeten lir saka state sorkar aser police-i sepaitemi yimsü asüba linük ka mesüka tashiyim mapa inyakogo, ta parnokisa shisem
Tai maketba nisungtem dak tashiyim agi mapa inyaktsü melena, tai tonglokja alirtem aputsüla. Tetsürtem aser tai maketba nisungtem dak tzü kahloktsüba aser tenük amdaktsüba mokozü amshia yirsutsüba atema CNTC-i kanga sasaa bilemtsür. Iba ama tashiyim mapa inyakba ajanga sorkari ozüng alema mapa inyakertem kümzüka ayur ta sayur.
Tarutsü lanuputu asoshi bilemja, tanü asenoki ochimashi anema ola adoktsü ayongzüker aser ACAUT-i tarutsü ajungtsü atema bilema taküm bendanga mapa inyakba asoshi tenüngsang agütsür aser parnok pusema nungiter, ta CNTC Media Cell sangdong nungsa metetdaktsü.
Dimapur District Citizens Forum (DDCF)-ia sangdong ka nung police-i yimjung rally nung adenertem dak tashiyim amshiba mapa aitsür, ta metetdaktsüogo.
Dimapur kübok City Tower aser Khermahal police point nung yimjung rally nung adenertem dak tzü kahloktsüba, tenük amdaktsüba mokozü amshiba aser süng agi züka merenshiba inyakyim aitsür. Tawa sorkari tzü kahloktsüba aser tenük amdaktsüba mokozü kanga bulua amshir. Nübortemi lungkak aittsü atema temeten lir aser sorkari yimjung meimba nübortem den tangatettep kati arutsü atema merangtsüla, saka nübortemji ozüng alema mapa inyakertem atema mezüngshitsüla, ta DDCF president, Joseph Lemtur-i sangdong ka nung ashi.
State sorkari küm 10 dak tema memeti aruba inyakyim ka ACAUT-i kaktetba atema DDCF-i ACAUT nem tenüngsang agütsür. Maneni, tarutsü nung Dimapur police-i nübortem nüngdak maliba nung memerenshitsü mepishir, ta DDCF-isa metetdaktsü.