CNTC-i anir Naga loktiliba akangshitsüla: Dr S C Jamir

Dimapur, March 12 (TYO): Central Nagaland Tribes Council (CNTC) nung ‘advanced tribes’ tematiba asem- Ao, Sema aser Lotha dena lir anungji kin asem longjemer Naga loktiliba akangshitsü atema inyaktsü ayongzüker, ta tanü taoba Odisha Governor aser taoba Nagaland Chief Minister Dr S C Jamir-i ashi.
CNTC indang 6 buba Annual General Session nung o jembidang Dr S.C Jamir-i “Naga nunger tensa tongtipang ka nung lir. Asenok arrtsü ka nung noktaka lir aser koba leni aotsü’ar telemtetba magi lir” ta ashi.
“Naga nungertemi Naga yimten tebilemtsü ya tangatetba tajung nung agizüktsüla aser olemteper telok anati timtem ajurubatem angatettsüla. Naga yimten latettsü atema mapaji CNTC indang teinyaktsü dang masü saka tanüngba kintemia külemi yariteptsüla. CNTC-i kin asem atema dang masü saka Nagaland nung tanüngba kintem atemaa bilemtsütsüla. Iba jagi asenok tangatetba aser tebilemba ulushitsü,” ta paisa ayongzük.
“Israel ama Naga nungeri liyonga otettsü ta asüba mulungsentsü alitsüla. Asenoki iba tangatetba asen mulungjangi aitdaktsüra, asenoki asen tia yangluba nung tongti shilem agitettsü,” ta S.C Jamir-isa shisem.
President mapa nungi anener Hokiye Yeptho-i anir ketdangpurtemi Western Sumi Totimi Hoho, Watsu Mungdang, Lotha Eloe Ekhung aser Central Nagaland Students Association teloktemi iba sentong takok ngua agitettsüsa yaritepba atema pelaba metetdaktsü.
Maneni, Ao Senden president Chubawati Longchar, Lotha Hoho chairman Er. Mhomdamo Ovung, Sumi Hoho president Hekushe Shikhu aser Nagaland Tribes Council president Toniho Yeptho nungertemia o jembi.