CNTC-i Dhansiri apu tejenba tekaraba nung renemtsü mepishir

Dimapur, January 28 (TYO): Central Nagaland Tribes Council (CNTC)-i state sorkar, department incharge aser contractor dang joko menoa melii Dhansiri apu tejenba tekaraba nung renemtsü atema mepishia metetdaktsüogo.

Iba apu yanglu tenzüker küm pezü jungogo; iba apu renemtsü atema mapang kanga indokogo, kechiyong tetsükdaktsü aika liasü, ajisüaka tesülen ang yanglu tenzükba apu karbo renemogo, ta CNTC Tir, T. Lanu Imchen-i sangdong ka nung metetdaktsü.

“Iba apu renemra sensotem kanga anisüngzüktsü, kechiyong Dimapur nung traffic tebilemtsü ajemtsü atema iba apu ya kanga tongtibang tesendaktep lenmang ka lir,” ta CNTC sangdong nung shia lir.

“Iba apu yanglutsü atema mapang talangka agiba agi Dimapur nung Zion Hospital nungi Khermahal police point aser City Tower tsüngda gari senzüsempongba tsütsü timtem tali adoker. Anungji CNTC-i ketdangsertem dang iba mapa tekaraba nung renema nüburtem anisüngzükdaktsütsü mepishir,” ta sangdong nung shia lir.