CNTC-i kechi inyaktsü ?

Nagaland anüdoklen Eastern Naga Peoples’ Organisation (ENPO) aser anülulen Tenymia Union ta tenteta alidak ano Nagaland tiyongtsü nung alir kin asem Ao, Sumi aser Lotha telongjem tentet ka tenüng agi Central Nagaland Tribes Council (CNTC) tenzükogo. Joko, tangbo Nagaland state ya loktiliba tsütsübo meshi asem nung po tongdak amato asütsü. Aji oda, Nagaland nung tenteta aliba lokti tentet telongjem tetsüdi asem ya putepa lira Nagaland nung tesünep alitsü. Atangji, Nagaland nung lokti tentet onsara, anungji joko lokti telongjem tentet tenteta aliba ya ajemtsüba dak alaka tasen tenzüka aotsübo majungshir. Ajisüaka, kodang lokti tentet ka tentetba ajanga tangar lokti tentet tenteta maliba purtem takoksa angutsüsa kümdir, iba jagi lokti telongjem  tenteta malirtem tipmedemi kümdaktsür aser tangar ama lokti telongjem tentettsü ajungshir. CNTC ya iba ama tensa tia kati akümtsüsa akümba lokti telongjem ka amai reprangtetter. Nagaland ya Naga nunger kin aika agi akümba state ka lir aser ano Nagaland kübok mamsemba Naga nunger kin aika tanga state aser country nung lir, anungji Naga nunger kin shiai tangar Naga nunger kintem den libaliro ashitsübaji kanga tongtibang mapa ka lir. Aji oda, CNTC kübok aliba kin asempronglai Naga nunger Naga kin ajak den libaliro meteta tesendaktep tajung ayutsübaji kanga tongtibang asütsü. CNTC ya Nagaland  tiyong nung aliba kintem telongjem lir, anungji Naga nunger anüdok aser anülulen alirtem na tsüngda apu amai asütsü. Aji oda, CNTC ya tangar anema inyaktsüba telok masü saka Naga nunger timtem aser shisabolu nung alidang teyari angudak tesem tajung ka mesemteta ayu amai asütsü. Joko, tentetadokerji, Naga nunger ajaki CNTC dak rangloker repranga atatsü. Tang nungibo Naga nungertemi CNTC-i kechi ashir ta jembitsü. Ibaji CNTC asoshi khuret tulu asütsü, anungji CNTC tenüng nung kechi jembidir aser kechi inyakdir alima aser nübortem meima bilemba nisungi jembiba ama jembitsü aser inyaktsüsa teti Tsüngrem nungi shisatsü meshia atatsüla. Tang Naga nunger asoshi nüngdak tulubaji telongjem, anungji CNTC ajanga Naga nunger anüdok aser anülulen alir ajak telongjem kati arutettsüsa lenmang api tenzüktsüla. Iba teinyaktsü khuretji angatettsü atema, tang Naga nunger ajak longjema alitsü tenzükba tentet Naga Hoho lir saka iba telongjem nung Naga nunger aika madener. Ano, tangalen alir Naga nunger kintemji yutsür Nagaland nung aliba Naga kintem telongjem tentettsü asoshi Naga Tribes Council (NTC) tenteta lir saka NTC nunga Naga kintem aika dena mali, anungji tang tashi nung Naga nunger kin ajak dena aliba Naga nunger lokti telongjem kata mali kümogo. Ibaji tebilemdangtsü aser tebilemtsü tulu lir. Item khurettemji benloktsü asoshi CNTC aküm südi ta bilemer. Anungji, anisüngzüka melii CNTC-i amang agi sangwa küma Naga Hoho nung Naga nunger longjemtsü aser NTC nunga Nagaland nung alir Naga kintem longjemtsü asoshi bendanga agüja inyaktsübaji kanga rongdak nüngdak mapa ka asütsü. Aji oda, CNTC tashi aittsübaji pei temeten kija bushia pei kija ajungtsü asoshi inyakba agi masü saka Naga nunger rangben ajungtsü asoshi inyakba mapatem agi tashi aittsü. CNTC nung aliba Naga kintemji Naga nunger tanishirtem lir, anungji CNTC nungi adokba shisatsü agi Nagaland anitsü teimla tulu lir. Aji oda, Nagaland nung CNTC tenzükba ajanga Naga nunger ajak tajangzük angutsüsa Nagaland nung inyakyim ajak shitakyimi bener arutsüla. Nagaland nung lokti telongjem tentet aika lir saka Nagalandbo tamajungba akümer ta asüba timtemji lokti tentet lenirtemi ochishia meinyaktetba ajanga lir. Aji oda, Nagaland shirangba aneptsü mozü tajungtibajibo ochi lir. Iba ochi-ji bener CNTC lenirtemi CNTC asoshi dang masü saka Naga nunger telongjem aser Nagaland ajungtsü atema inyaktsü imlar.