CNTC-i Lotha Hoho aser Sumi Hoho taginüba nungiter

Dimapur, April 06 (TYO): Central Nagaland Tribes Council (CNTC) kübok dena aliba kin ana Sumi Hoho aser Lotha Hoho nati government nem inyakdaktsünüa akangba mapa nungji nungiter ta tanü sangdong ka ajanga metetdaktsüogo.
Sumi Hoho-i Atoizu nung aliba Khelhoshe Polytechnic ya Engineering College küma lapokdaktsüner aser Lotha Hohoi Wokha district nung gari lenmang yangluba nung tanga district nem lemzüktsüba ama senotsü lemzükdaktsüner.
Atoizu nung aliba Polytecnic ya 2007 küm December 17 nü cabinet-i Engineering college küma lapoktsü asoshi telemtetba agi saka tang tashi iba telemtetbaji mapa küma meinyaker ta CNTC-isa jashia metetdaktsü.
Wokha district kübok aliba gari lenmangtem yanglutsü asoshi senotsü junga melemzüktsüba atema mepelaba metetdaktsü dang, Wokha district ya Nagaland nungbo district tulutem rongnung pezübuba lir aser nütsüng yongsük nunga teimtiba asükba nung trokbuba nung lir, ajisüaka gari lenmang atema senotsü lemzüktsübajibo kangasa meshitak aser mezüngoki inyakba ama inyakogo ta CNTC-isa ashi.
Wokha district kübok aliba gari lenmang yanglutsü atema lemzükba sen tanga tesemtem nung belena bener oa amshiba angur aser iba atemaji yimsüsürtemi kecha ola adokba mangashi ta parnokisa metetdaktsü.
Tang state nung gari lenmangtem nung gari mejajatettsüsa kanga mejungi raksar lir, anungji lenmang yanglutsü senotsü lemzüktsüba mapaji shitak inyaktsüla ta CNTC-isa metetdaktsüogo.