CNTC-i NHIDCL dang mepishir

Dimapur, August 17 (TYO): Central Nagaland Tribes Council (CNTC)-i National Highway Infrastructure Development Limited (NHIDCL) dang, tang state nung teyangludak gari lenmangtem junga yanglutsüla, junga meyanglura ibajibo magizüktettsü, ta metetdaktsüogo, ta Brihostibarnü CNTC Media Cell-i sangdong ka ajanga metetdaktsü.
Dimapur nung aliba parnok indang office nung NHIDCL ketdangsertem den senden ka amendang CNTC-i, “Lotha Hoho-i Chief Engineer (NH), NPWD dang DPR aser sanction order den work orders agütsüba osang tejangja akhangbaji onoki nungiter,” ta metetdaktsüogo, ta sangdong nung shia lir.
CNTC-i NHIDCL dang Wokha-Merapani NH/789 mapaji local contractors nem magütsütsüla, kechiyong ochimashi contractor kari lateta aliba ama mapa meshitaki inyaker, aser tatem nungbo nüburtem ang takoksa angur, ta metetdaktsü.
NHIDLC-ia CNTC dang, parnoki mapa tajungtiba agi inyaktsü aser Naga nunger takoksa mengudaktsütsü, ta metetdaktsü.
Kushiabil-Patkai lenmang nung four lane dak sendakba nung NHIDCL-i, iba lenmangji züngzüka aliba mapang shidak nung tembanga inyaktsü, ta metetdaktsü.
CNTC-isa, state nung tang terenlok mapa teinyakdak nung tema nung alir mesüra telungpur tentet shingaia tetsükdaktsü magütsütsüla, kechiyong ibaji ajanga state aser nüburtem terenlok aser azükaru nung kongshitsü, ta ashi.
CNTC-isa NHIDCL dang, Naga nunger den senteper onoki, terenlok mapa balala nokdangertem aser nübur anema inyakertem nokdangtsü ta shiogo, ta kasa sangdong ajangasa metetdaktsü.