CNTC-i ozüng alema arurtem meindoktsü akhanger

Dimapur, August 30 (TYO): Nagaland nung ozüng alema arua alirtem mazüoktetba aser nisung onsara aruba atema Central Nagaland Tribes Council-i khuret bena, state sorkar dang iba khuret atema mapa inyaktsü takhangba agütsüogo.
Centre sorkar aser MHA-i state nung ozüng alema arua alirtem jangjatsü aser pei tarudaki meyipa yoktsü atema tetuyuba agütsüba ama, state sorkari iba mapaji tangsatang inyaktsüla, ta Media Cell, CNTC-i sangdong ka nung metetdaktsü.
Tanü asen state-i bendangertem ozüng alema aruba ya menokdangra, tarutsü putupurtem lendong aser timtem tulu ajurutsü. Sorkari Nagaland nung lisopurtem kümzüka ayutsü atema teinyaktsü meinyaki zübazüba yutsür, ta CNTC-isa ashi.
CNTC-i iba tebilemtsü ya tribal hohos, civil societies, kaketshir teloktem aser arogotem den lemsateptsü.
Maneni kiyong aser yimtsüng aika nung GBS/Chairmen-i Permanent Residence Certificates (PRC) agütsüba nung ajemdaker ketdangsertemi driving license aadhar cards, PAN cards amalatem agütsür. Asen tarutsü putupur mesamadang asenoki iba inyakyim ya anentsüla, ta Media Cell sangdong nungsa shia lir.
CNTC-i Nagaland ya Tripura ama mekümdaktsütsü kechiyong idakji lisopurtem ang telok tilaba kümogo. Anungji Centre-i tuyuba ama, state sorkari district jenjang nung task force tentettsü aser ozüng alema arurtem jangja tekaratiba nung state nungi anientsü atema mapa inyaktsüla, ta sangdong nungsa metetdaktsü.